ស្ថាប័នគ្រប់គ្រងបាល់ទាត់ពិភពលោក FIFA បានប្រកាសកាលពីថ្ងៃពុធថា ខ្លួនបានដកបម្រាមរបស់រុស្ស៊ីពីបាល់ទាត់អន្តរជាតិ ដោយអនុញ្ញាតឱ្យក្រុមអាយុក្រោម ១៧ ឆ្នាំមកពីប្រទេសនេះចូលរួមការប្រកួតក្រោមការគ្រប់គ្រងរបស់ FIFA ឡើងវិញ ។
ការផ្លាស់ប្តូរនេះធ្វើឡើង បន្ទាប់ពីការដកបម្រាមស្រដៀងគ្នាលើក្រុមយុវជនរុស្ស៊ី កាលពីសប្តាហ៍មុនដោយស្ថាប័នបាល់ទាត់អឺរ៉ុប UEFA ។
ក្រុមបាល់ទាត់ទាំងនារី និងបុរសអាយុក្រោម ១៧ឆ្នាំទាំងនេះដែលលេងក្រោមឈ្មោះ ‘សហព័ន្ធបាល់ទាត់នៃប្រទេសរុស្ស៊ី’ ជាជាងប្រទេសរុស្ស៊ី ដោយគ្មានការបង្ហាញទង់ជាតិរបស់ពួកគេ គោរពភ្លេងជាតិរបស់រុស្ស៊ីទេ នេះបើតាម FIFA បាននិយាយនៅក្នុងសេចក្តីថ្លែងការណ៍មួយ ។
ក្រុមបាល់ទាត់មកពីប្រទេសរុស្ស៊ីត្រូវបានហាមឃាត់មិនឱ្យលេងបាល់ទាត់អន្តរជាតិបន្ទាប់ពីការលុកលុយរបស់រុស្ស៊ីលើអ៊ុយក្រែន ។
UEFA បានសម្រេចចិត្តបន្ទាប់ពីការលុកលុយរបស់រុស្ស៊ីក្នុងខែកុម្ភៈ ឆ្នាំ 2022 ថាក្រុមរុស្ស៊ីទាំងអស់ ទាំងក្រុមជាតិ ឬក្លឹប នឹងត្រូវបានព្យួរពីការចូលរួមក្នុងការប្រកួតរបស់ខ្លួន ។
ប៉ុន្តែកាលពីសប្តាហ៍មុន ស្ថាប័នគ្រប់គ្រងបាល់ទាត់អ៊ឺរ៉ុបបាននិយាយថា “កុមារមិនគួរត្រូវបានពិន័យចំពោះសកម្មភាពដែលជាការទទួលខុសត្រូវរបស់មនុស្សពេញវ័យទេ” ហើយថាក្រុម U-17 របស់រុស្សីនឹងត្រូវបានបញ្ជូនទៅការប្រកួត UEFA “ក្នុងរដូវកាលនេះ”។
សមាគមបាល់ទាត់អ៊ុយក្រែនបានជំរុញឱ្យ UEFA ពិចារណាឡើងវិញនូវការសម្រេចចិត្តរបស់ខ្លួន ហើយបាននិយាយថា ខ្លួននឹងមិនលេងក្នុងការប្រកួតដែលពាក់ព័ន្ធនឹងក្រុមរុស្ស៊ីឡើយ ។ អង់គ្លេស ន័រវែស ស៊ុយអែត និងដាណឺម៉ាក ក៏បាននិយាយដែរថា ក្រុមយុវជនរបស់ពួកគេនឹងមិនប្រកួតជាមួយរុស្ស៊ីដែរ បើទោះបីជាការសម្រេចចិត្តរបស់ UEFA ក៏ដោយ។
Reuters
