ប៉ូលិសថៃបានចាប់ខ្លួនមនុស្សបីនាក់ដែលត្រូវបានចោទប្រកាន់ពីបទលក់កាំភ្លើងទៅឱ្យក្មេងអាយុ ១៤ ឆ្នាំម្នាក់ដែលបានធ្វើសកម្មភាពបាញ់ប្រហារនៅផ្សារទំនើប Siam Paragon កណ្ដាលក្រុងបាងកក ដែលបណ្តាលឲ្យមនុស្សពីរនាក់ស្លាប់ ។
ក្មេងជំទង់រូបនេះត្រូវបានចោទប្រកាន់ពីបទមនុស្សឃាតជុំវិញការវាយប្រហារកាលពីថ្ងៃអង្គារទី ៣ ខែតុលានៅឯផ្សារទំនើប Siam Paragon ។ ប៉ូលិសនិយាយថា ជនសង្ស័យរូបនោះបានប្រើកាំភ្លើងខ្លីមួយដើមកែច្នៃដើម្បីបាញ់គ្រាប់ពិត ។
មន្ត្រីនៅក្នុងខេត្តយ៉ាឡា នៅភាគខាងត្បូងប្រទេសថៃ បានចាប់ខ្លួនបុរសពីរនាក់កាលពីព្រឹកថ្ងៃព្រហស្បតិ៍ ដោយសង្ស័យថាបានលក់កាំភ្លើងឱ្យក្មេងប្រុសនោះ ។ ជនទី៣ ជាអ្នករស់នៅទីក្រុងបាងកក ក៏ស្ថិតក្នុងការឃុំឃាំងរបស់ប៉ូលិសដែរ នេះបើតាមកាសែត The Nation។
ប៉ូលិសជាន់ខ្ពស់ម្នាក់នៅខេត្តយ៉ាឡាបានប្រាប់សារព័ត៌មានបារាំង AFP ថា “ប៉ូលិសបានឆ្មក់ចូលផ្ទះរបស់ពួកគេដើម្បីស្វែងរកភស្តុតាងបន្ថែមទៀតដែលទាក់ទងនឹងករណីនេះ” ។ “ពួកគេត្រូវបានបញ្ជូនទៅកាន់ទីក្រុងបាងកក ដើម្បីសាកសួរ”។
យោងតាមរបាយការណ៍របស់ប្រព័ន្ធផ្សព្វផ្សាយថៃបានឲ្យដឹងថា ជនសង្ស័យម្នាក់ជាអ្នកច្នៃកាំភ្លើង ម្នាក់ទៀតបានលក់អាវុធ ហើយអ្នកទីបីបានដកប្រាក់ដែលរកបានពីការលក់របស់ពួកគេចេញពីម៉ាស៊ីនអេធីអឹម ។
អ្នកដើរទិញឥវ៉ាន់រាប់រយនាក់បានរត់គេចពីផ្សារទំនើបដែលប្រមូលផ្តុំដោយភាពភ័យខ្លាច ខណៈដែលការបាញ់ប្រហារបានកើតឡើងនៅរសៀលថ្ងៃអង្គារ។
ស្ត្រីម្នាក់មកពីប្រទេសចិន និងម្នាក់ទៀតមកពីមីយ៉ាន់ម៉ាត្រូវបានបាញ់សម្លាប់ ខណៈ៥នាក់ផ្សេងទៀតរងរបួស ។
ជនសង្ស័យអាយុ១៤ឆ្នាំ ត្រូវបានចោទប្រកាន់ពីបទប៉ុនប៉ងមនុស្សឃាត ការកាន់អាវុធបាញ់រះនៅទីសាធារណៈ និងកាន់កាប់អាវុធគ្មានច្បាប់អនុញ្ញាត និងកំពុងទទួលការធ្វើតេស្ដជំងឺវិកលចរិត ដើម្បីមើលថាតើគាត់សមនឹងទទួលការជំនុំជម្រះឬអត់។
AFP