ការដឹកជញ្ជូនឧស្ម័នធម្មជាតិរាវលើកដំបូងពីសហរដ្ឋអាម៉េរិកបានមកដល់ប្រទេសអាល្លឺម៉ង់ហើយនៅថ្ងៃអង្គារនេះ ដែលជាផ្នែកនៃកិច្ចខិតខំប្រឹងប្រែងដ៏ទូលំទូលាយ ដើម្បីជួយប្រទេសនេះជំនួសការផ្គត់ផ្គង់ថាមពលដែលខ្លួនបានទទួលពីមុនពីប្រទេសរុស្ស៊ី ។
កប៉ាល់ដឹកប្រេង Maria Energy បានមកដល់កំពង់ផែ Wilhelmshaven នៃសមុទ្រខាងជើង ជាកន្លែងដែលការដឹកជញ្ជូនឧស្ម័នធម្មជាតិរាវនឹងត្រូវបានបំប្លែងទៅជាឧស្ម័នវិញនៅឯស្ថានីយអណ្តែតទឹកពិសេសដែលត្រូវបានសម្ពោធកាលពីខែមុនដោយអធិការបតីអាល្លឺម៉ង់លោក Olaf Scholz ។
អាល្លឺម៉ង់បានប្រញាប់ប្រញាល់ស្វែងរកការជំនួសការផ្គត់ផ្គង់ឧស្ម័នរបស់រុស្ស៊ី បន្ទាប់ពីរុស្ស៊ីឈ្លានពានអ៊ុយក្រែន ។ គ្រឿងបរិក្ខារនៅកំពង់ផែ Wilhelmshaven គឺជាស្ថានីយមួយក្នុងចំណោមស្ថានីយជាច្រើនដែលត្រូវបានដាក់ឱ្យដំណើរការដើម្បីជួយជៀសវាងការខ្វះខាតការផ្គត់ផ្គង់ថាមពល ។
ប្រទេសអាល្លឺម៉ង់ក៏បានដំណើរការឡើងវិញជាបណ្តោះអាសន្ននូវស្ថានីយថាមពលដែលប្រើដោយប្រេង និងធ្យូងថ្មចាស់ និងបានបន្តអាយុកាលនៃរោងចក្រថាមពលនុយក្លេអ៊ែរចុងក្រោយចំនួនបីរបស់ខ្លួនរហូតដល់ពាក់កណ្តាលខែមេសា ។
ក្រុមអ្នកធ្វើយុទ្ធនាការបរិស្ថានបាននិយាយថា ពួកគេមានគម្រោងតវ៉ាចំពោះការមកដល់របស់នាវាដឹកប្រេង Maria Energy ដោយលើកហេតុផលថា អាល្លឺម៉ង់មិនគួរនាំចូលឥន្ធនៈហ្វូស៊ីលនោះទេ ។
ប្រភព ៖ AP
Translate by VISAL
