ក្រុមហ៊ុនបច្ចេកវិទ្យាយក្ស Apple កំពុងសំងំបង្កើតមនុស្សយន្តសម្រាប់ប្រើប្រាស់នៅក្នុងផ្ទះ ដោយនឹងក្លាយជា “រឿងដ៏ធំ” ដែលមិនធ្លាប់មានរបស់ក្រុមហ៊ុននេះ បើយោងតាមប្រភពជិតស្និទ្ធនឹង Apple ។
កិច្ចខិតខំប្រឹងប្រែងនេះនៅតែស្ថិតក្នុងដំណាក់កាលចាប់ផ្តើម ហើយវាមិនច្បាស់ថាតើផលិតផលសម្រេចនឹងត្រូវចេញពេលណាទេ ។ Apple កំពុងស្ថិតនៅក្រោមសម្ពាធកាន់តែខ្លាំងក្នុងការស្វែងរកប្រភពចំណូលថ្មី ក្រោយក្រុមហ៊ុននេះបានលុបចោលគម្រោងរថយន្តអគ្គិសនីកាលពីក្នុងខែកុម្ភៈ ។
ក្រៅពីរថយន្តអគ្គិសនី គម្រោងថ្មីៗរបស់ Apple ក៏រួមបញ្ចូលវ៉ែនតា Apple Vision Pro របស់ពួកគេផងដែរ ។ ទោះបីជាយ៉ាងណាក៏ដោយ Apple Vision Pro គឺជាការច្នៃប្រឌិតដ៏ធំសម្បើមមួយ ប៉ុន្តែមិនទាន់ត្រូវបានគេដាក់ឱ្យប្រើប្រាស់យ៉ាងទូលំទូលាយសម្រាប់ពិភពលោកនោះទេ ។ ជាងនេះទៅទៀតតម្លៃដ៏ថ្លៃមានន័យថា វាអាចត្រូវការពេលវេលាសម្រាប់ពិភពលោក ដើម្បីចាប់យក និងទទួលបានទម្លាប់ប្រើប្រាស់ Apple Vision Pro ។
តើមនុស្សយន្ត Apple Home នឹងធ្វើអ្វី?
គំនិតដំបូងរួមមានការបង្ហាញដែលធ្វើត្រាប់តាមចលនាក្បាល ដូចជាការងក់ក្បាល របស់មនុស្ស ។ Apple Home Robot ទំនងជាមានមុខងារជាច្រើនទៀតដើម្បីផ្តល់ប្រយោជន៍ដល់ការកែលម្អ និងថែទាំគេហដ្ឋាន ។ កាលពីដើមឆ្នាំ២០២៤នេះ Apple បានទិញយកក្រុមហ៊ុន DarwinAI ដែលជាក្រុមហ៊ុនបញ្ញាសិប្បនិមិត្តដែលមានមូលដ្ឋាននៅប្រទេសកាណាដា ។ ការទិញក្រុមហ៊ុននេះបានបង្ហាញពីការផ្តោតលើការអភិវឌ្ឍលើបច្ចេកវិទ្យា AI នៅថ្ងៃអនាគតរបស់ Apple។
Bloomberg