បណ្ដាញសង្គមទាំងអស់ដែលស្ថិតក្រោមការគ្រប់គ្រងរបស់ META Platform បានជួបប្រទះនឹងការគាំងមិនអាចចូលប្រើប្រាស់បាននៅទូទាំងពិភពលោក នេះបើយោងតាមវេបសាយតាមដានការជាប់គាំងអេបទូទាំងពិភពលោកដែលមានឈ្មោះថា Downdetector ។
បើតាមការបញ្ជាក់ពីអ្នកនាំពាក្យ META Platform លោក Andy Stone Facebook, Instagram និង Messenger បានជួបប្រទះនូវ “បញ្ហាបច្ចេកទេស” ដែលធ្វើអោយអ្នកប្រើប្រាស់មិនអាចចូលកម្មវិធី ផ្ញើ ឬទទួលសារ ឬពិនិត្យមើលការបង្ហោះចុងក្រោយបំផុតដែលចែករំលែកដោយមិត្តភក្តិ និងក្រុមគ្រួសារ ។ លោកក៏បានធ្វើការសំទោសផងដែរដល់អ្នកដែលជួបប្រទះនឹងបញ្ហានេះ ។
ក្រោយការជាប់គាំងដែលមានរយៈពេលប្រមាណ ៧០នាទីក្រុមហ៊ុនMeta ដែលដឹកនាំដោយលោក Mark Zuckerberg បានខាតបង់ប្រាក់ 1.5% នៃតម្លៃទីផ្សារសរុបរបស់ក្រុមហ៊ុន META Platform ដែលស្មើនឹង 18 ពាន់លានដុល្លារ (ក្រុមហ៊ុន META មានតម្លៃ 1.26 ពាន់ពាន់លានដុល្លារ) នេះបើតាមការគណនារបស់អ្នកជំនាញប្រចាំស្ថាប័នព័ត៌មាន GB News របស់អង់គ្លេស ។
បើតាម Downdetector ប្រព័ន្ធផ្សព្វផ្សាយស្ទើរតែទាំងអស់របស់អាម៉េរិកសុទ្ធតែជួបប្រទះនឹងការជាប់គាំងកាលពីយប់ក្នុងពេលតំណាលៗគ្នារួមមានទាំង X, YouTube, Discord, Google , Google Play, Tiktok តែជាការគាំងទ្រង់ទ្រាយតូចមិនមែនគាំងលក្ខណៈទ្រង់ទ្រាយធំដូចកម្មវិធីរបស់ META ទេ ។
