មន្ទីរពិសោធន៍ឯករាជ្យរបស់សហរដ្ឋអាម៉េរិកឈ្មោះថា Valisure បាននិយាយថា កម្រិតខ្ពស់នៃសារធាតុ benzene ជាធាតុគីមីដែលបង្កមហារីកត្រូវបានរកឃើញនៅក្នុងការព្យាបាលមុនមួយចំនួនពីម៉ាកនានា រួមមាន Estee Lauder’s Clinique, Target’s Up & Up និង Clearasil ដែលសុទ្ធតែជាក្រុមហ៊ុនរបស់អាម៉េរិក ។
មន្ទីរពិសោធន៍ Valisure ដែលមានមូលដ្ឋាននៅរដ្ឋ Connecticut ក៏បានដាក់ញត្តិទៅរដ្ឋបាលចំណីអាហារ និងឱសថសហរដ្ឋអាម៉េរិក ដោយអំពាវនាវឱ្យប្រមូលផលិតផលទាំងអស់នោះមកធ្វើការស៊ើបអង្កេត និងពិនិត្យឡើងវិញ ។
របាយការណ៍បាននិយាយថា benzene អាចកើតឡើងក្នុងកម្រិតខ្ពស់ដែលមិនអាចទទួលយកបាន ហើយលទ្ធផលពីការធ្វើតេស្តរបស់មន្ទីរពិសោធន៍ បង្ហាញថាផលិតផលមួយចំនួនអាចបង្កើតបានច្រើនជាង 800 ដងនៃកំហាប់សម្រាប់ benzene ដែលស្ថិតក្នុងលក្ខខណ្ឌសុវត្ថិភាពរបស់រដ្ឋបាលចំណីអាហារ និងឪសថអាមេរិក។
ការធ្វើតេស្តដែលពាក់ព័ន្ធនឹងផលិតផលរាប់សិបប្រភេទនេះ បានបង្ហាញថា នៅពេលដែលថ្នាំព្យាបាលមុន benzoyl peroxide ត្រូវបានរក្សាទុក ឬដាក់នៅកន្លែងមានសីតុណ្ហភាពខ្ពស់ ដូចជាពេលទុកក្នុងឡានក្តៅជាង 150 អង្សាហ្វារិនហៃ យ៉ាងហោចណាស់ 14 ថ្ងៃ ពួកគេអាចបង្កើតកម្រិត benzene ខ្ពស់។
Benzene គឺជាសមាសធាតុធម្មជាតិដែលមានក្នុងប្រេងសាំង និងផ្សែងថ្នាំជក់ ហើយអាចបណ្តាលឱ្យកើតជំងឺមហារីកឈាមក្នុងបរិមាណខ្ពស់ នេះបើយោងតាមមជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក។ ក្នុងរយៈពេល 3 ឆ្នាំកន្លងមកនេះ វាត្រូវបានគេរកឃើញនៅក្នុងផលិតផលដ៏ពេញនិយមជាច្រើន ។
រដ្ឋបាលចំណីអាហារ និងឪសថអាមេរិកបាននិយាយថា ខ្លួននឹងធ្វើការដើម្បីផ្ទៀងផ្ទាត់លើទិន្នន័យរបស់មន្ទីរពិសោធន៍ Valisure ។ លោក Jeremy Kahn អ្នកនាំពាក្យរបស់រដ្ឋបាលចំណីអាហារ និងឪសថអាមេរិកបាននិយាយនៅក្នុងសេចក្តីថ្លែងការណ៍មួយថា “ទីភ្នាក់ងារនឹងបន្តផ្តល់ព័ត៌មានថ្មីៗដល់សាធារណជនទាក់ទងនឹងសារធាតុ benzene នៅក្នុងផលិតផលថែរក្សាសម្រស់ទាំងនេះ” ។ លោកបន្តថា ក្រុមហ៊ុននានាត្រូវធានាសុវត្ថិភាពផលិតផលរបស់ខ្លួន ។
Bloomberg