ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានដកតំណែងរដ្ឋមន្ត្រីការពារជាតិរបស់គាត់ដោយលើកឡើងពីតម្រូវការសម្រាប់ “វិធីសាស្រ្តថ្មី” នៅពេលដែលសង្រ្គាមជាមួយរុស្ស៊ីឈានចូលដល់ខែទី ១៩ ។ លោក ហ្សេលេនស្គី បាននិយាយថា “នៅសប្តាហ៍នេះ សភានឹងត្រូវបានស្នើសុំឱ្យធ្វើការសម្រេចចិត្តលើការផ្លាស់ប្ដូររដ្ឋមន្ត្រីការពារជាតិអ៊ុយក្រែន ដោយបានតែងតាំងលោក Rustem Umerov អតីតសមាជិកសភាអ៊ុយក្រែនឲ្យក្លាយជារដ្ឋមន្ត្រីការពារជាតិថ្មី ។
លោក ហ្សេលេនស្គី បាននិយាយថា សភានៃប្រទេសអ៊ុយក្រែនស្គាល់លោក Rustem Umerov យ៉ាងច្បាស់ ហើយលោក Umerov មិនត្រូវការការណែនាំបន្ថែមទេ”។ “ខ្ញុំរំពឹងថាសភានឹងគាំទ្របេក្ខជននេះ”។
លោក Reznikov បានបម្រើការជារដ្ឋមន្ត្រីការពារជាតិចាប់តាំងពីខែវិច្ឆិកា ឆ្នាំ ២០២១ ដោយធ្លាប់បានបម្រើការក្នុងតួនាទីរដ្ឋាភិបាលផ្សេងទៀតដូចជាឧបនាយករដ្ឋមន្ត្រី នេះបើយោងតាមជីវប្រវត្តិរបស់គាត់នៅលើគេហទំព័ររបស់ក្រសួងការពារជាតិ ។ ការដកតំណែងរបស់លោកកើតឡើងបន្ទាប់ពីមានរឿងអាស្រូវពុករលួយជាច្រើនដែលពាក់ព័ន្ធនឹងក្រសួងការពារជាតិអ៊ុយក្រែន ។ នៅថ្ងៃនេះលោក Reznikov ក៏បានដាក់ពាក្យលាលែងចេញពីតំណែងទៅកាន់សភាផងដែរ នេះបើតាមសារនៅលើបណ្ដាញសង្គម X(Twitter) ។
លោក ហ្សេលេនស្គី បានបណ្តេញមន្ត្រីជាន់ខ្ពស់មួយចំនួននៅដើមឆ្នាំនេះជុំវិញរឿងអាស្រូវពុករលួយដែលទាក់ទងនឹងការទិញការផ្គត់ផ្គង់ក្នុងការធ្វើសង្គ្រាមជាមួយរុស្ស៊ី ។ អនុរដ្ឋមន្ត្រីការពារជាតិរបស់ប្រទេសនេះបានលាលែងពីតំណែងបន្ទាប់ពីប្រឈមមុខនឹងការចោទប្រកាន់ពីបទពុករលួយ ។ បន្ទាប់មកនៅក្នុងខែសីហាលោក ហ្សេលេនស្គី បានដកតំណែងមន្ត្រីទាំងអស់ដែលទទួលបន្ទុកមជ្ឈមណ្ឌលជ្រើសរើសយោធាក្នុងតំបន់ដោយលើកឡើងពីដំណើរការព្រហ្មទណ្ឌដែលកំពុងបន្តជាច្រើន ។
CNN