ក្រុមហ៊ុនផលិតរថយន្តអគ្គិសនី Tesla គ្រោងនឹងបញ្ឈប់បុគ្គលិកជាង ១០ ភាគរយនៃកម្លាំងពលកម្មសកលរបស់ខ្លួនដែលនេះស្មើនឹងជាង ១៤,០០០នាក់ នៃបុគ្គលិកសរុបជាង១៤០,០០០ នាក់ នេះបើយោងតាមកំណត់ហេតុដែលបានផ្ញើទៅបុគ្គលិកក្រុមហ៊ុនដោយនាយកប្រតិបត្តិលោក Elon Musk ។
លោក Elon Musk បានប្រាប់បុគ្គលិកតាមអ៊ីមែលកាលពីថ្ងៃចន្ទថា ការកាត់បន្ថយគឺចាំបាច់ដោយសារតែការជាន់គ្នានៃតួនាទី និងមុខងារការងារនៅក្នុងតំបន់មួយចំនួន។ នៅពេលយើងរៀបចំក្រុមហ៊ុនសម្រាប់ដំណាក់កាលបន្ទាប់នៃការរីកចម្រើន វាពិតជាមានសារៈសំខាន់ខ្លាំងណាស់ក្នុងការពិនិត្យមើលគ្រប់ផ្នែកនៃក្រុមហ៊ុនសម្រាប់ការកាត់បន្ថយការចំណាយ និងការបង្កើនផលិតភាព ។ លោកក៏បានថ្លែងអំណរគុណដល់បុគ្គលិកដែលនៅសេសសល់សម្រាប់ការងារដ៏លំបាកដែលនៅពេលខាងមុខ ។
នៅក្នុងការប្រកាសនៅលើ X បន្ទាប់ពីព័ត៌មានបានបែកធ្លាយជាសាធារណៈ លោក Elon Musk បាននិយាយថា Tesla ចាំបាច់ត្រូវរៀបចំឡើងវិញ និងសម្របសម្រួលក្រុមហ៊ុនសម្រាប់ដំណាក់កាលបន្ទាប់នៃកំណើនរៀងរាល់ប្រាំឆ្នាំម្តង។
Tesla ប្រឈមមុខនឹងការប្រកួតប្រជែងកាន់តែខ្លាំងនៅក្នុងប្រទេសចិនក្នុងសង្គ្រាមតម្លៃដ៏ខ្លាំងក្លាជាមួយគូប្រជែងដែលដឹកនាំដោយ BYD ។
Al Jazeera
