ខណៈដែលក្រុមហ៊ុនវិនិយោគមួយចំនួនបានផ្លាស់ប្ដូរទីតាំងរោងចក្រផលិតរបស់ពួកគេចេញពីប្រទេសចិននៅពេលនោះមែន តែពេលនេះ ការរាតត្បាតនៃជំងឺកូវីត-19 និងផែនការ “សូន្យកូវីត” របស់ប្រទេសចិនបានក្លាយជាមូលហេតុចម្បងដែលនាំឱ្យក្រុមហ៊ុនវិនិយោគនានា នាំគ្នាចាប់ផ្ដើមរកប្រទេសថ្មីដើម្បីផ្លាស់ប្ដូររោងចក្រផលិតកម្មរបស់ខ្លួនទៅទីនោះ។
នេះគឺជាប្រទេសចំនួនប្រាំដែលខ្សែសង្វាក់ផ្គត់ផ្គង់ក្នុងប្រទេសចិនកំពុងផ្លាស់ប្តូរទៅជំនួសវិញ៖
1. ប្រទេសឥណ្ឌា: ប្រទេសឥណ្ឌាកំពុងព្យាយាមប្រែក្លាយទៅជាប្រទេសមានផលិតកម្មលំដាប់ខ្ពស់ ដោយមានក្រុមហ៊ុនដូចជា ក្រុមហ៊ុន Apple និងក្រុមហ៊ុនផលិតបន្ទះឈីបបានកំពុងសម្លឹងឃើញទឹកដីដ៏ធំរបស់ឥណ្ឌា និងចំនួនប្រជាជនដ៏ច្រើនក្នុងប្រទេសនេះ។
2. ប្រទេសវៀតណាម:
ក្នុងនាមជាប្រទេសកុម្មុយនិស្ត វៀតណាមក៏ដូចជាប្រទេសចិនដែរ ក៏បាននឹងកំពុងធ្វើកំណែទម្រង់សេដ្ឋកិច្ចយ៉ាងឆាប់រហ័សចាប់តាំងពីឆ្នាំ 1986 មក ដែលបានផ្តល់ផលចំណេញយ៉ាងច្រើន ដោយចំណុចខ្លាំងសំខាន់ៗរបស់វៀតណាម គឺនៅក្នុងការផលិតសម្លៀកបំពាក់ ស្បែកជើង គ្រឿងអេឡិចត្រូនិក និងឧបករណ៍អគ្គិសនី។ ក្រុមហ៊ុនដែលបានផ្លាស់ប្តូរខ្សែសង្វាក់ផលិតកម្មរបស់ពួកគេចេញពីប្រទេសចិនទៅកាន់ប្រទេសវៀតណាមរួមមានដូចជា Apple, Nike, Adidas, Samsung ។ល។
3. ប្រទេសថៃ:
ក្នុងនាមជាមហាអំណាចសេដ្ឋកិច្ចទីពីររបស់អាស៊ីអាគ្នេយ៍ ប្រទេសថៃបាននឹងអភិវឌ្ឍខ្សែសង្វាក់ផលិតកម្មខ្លួន ហើយជាមជ្ឈមណ្ឌលផលិតកម្មសម្រាប់គ្រឿងបន្លាស់រថយន្ត យានជំនិះ និងគ្រឿងអេឡិចត្រូនិក ដោយមានក្រុមហ៊ុនចម្រុះជាតិសាសន៍ដូចជា Sony និង Sharp បានបង្កើតហាងលក់ផលិតផលរបស់ពួកគេនៅទីនេះ។
4. ប្រទេសបង់ក្លាដែស:
ប្រទេសបង់ក្លាដែសកំពុងក្លាយជាតារារះថ្មីនៅក្នុងវិស័យផលិតកម្មកាត់ដេរ។ ដោយសារតែការកើនឡើងនូវថ្លៃពលកម្មនៅក្នុងប្រទេសចិន បានជំរុញឱ្យក្រុមហ៊ុនកាត់ដេរស្វែងរកដៃគូជំនួស ដូចជាប្រទេសបង់ក្លាដែសដែលមានតម្លៃផលិតកម្មទាប។ ប្រទេសនេះក៏ជាប្រទេសនាំចេញសម្លៀកបំពាក់ធំជាងគេទីពីររបស់ពិភពលោកបន្ទាប់ពីប្រទេសចិន។ ឥឡូវនេះប្រទេសបង់ក្លាដែសកំពុងព្យាយាមទាក់ទាញការវិនិយោគបន្ថែមទៀតទៅក្នុងវិស័យផ្សេងទៀតរួមទាំងឱសថ និងកសិកម្មកែច្នៃ។
5. ប្រទេសម៉ាឡេស៊ី:
ដោយសារការខិតខំប្រឹងប្រែង ប្រទេសម៉ាឡេស៊ីបានទាក់ទាញគម្រោងយ៉ាងហោចណាស់ ៣២ ដែលបានផ្លាស់ប្តូរទីតាំងពីប្រទេសចិនមកប្រទេសម៉ាឡេស៊ី នេះបើតាមអាជ្ញាធរអភិវឌ្ឍការ វិនិយោគម៉ាឡេស៊ីបានឲ្យដឹងកាលពីខែកក្កដា ឆ្នាំ២០២០។ និងបើយោងតាមព័ត៌មានផ្លូវការរបស់រដ្ឋាភិបាលម៉ាឡេសុីបានឱ្យដឹងថា លំហូរវិនិយោគផ្ទាល់ពីបរទេសទៅកាន់ម៉ាឡេស៊ីក្នុងឆ្នាំ 2021 បានកើនឡើងដល់កម្រិតខ្ពស់មួយក្នុងរយៈពេលប្រាំឆ្នាំមកនេះចំនួន 48.1 ពាន់លានដុល្លារ ដោយការផលិតគ្រឿងអេឡិចត្រូនិក និងយានជំនិះគឺជាអ្នករួមចំណែកដ៏សំខាន់។
ប្រភព ៖ Business Insider
Translate by PANHA PICH