ប្រទេសជប៉ុនបានប្រកាសពីផែនការកាលពីថ្ងៃពុធដើម្បីអភិវឌ្ឍយន្តហោះដឹកអ្នកដំណើរជំនាន់ក្រោយដែលផលិតក្នុងស្រុកជប៉ុន ។
សេចក្តីថ្លែងការណ៍ក្រសួងពាណិជ្ជកម្មជប៉ុនបាននិយាយថា “វាមានសារៈសំខាន់សម្រាប់ពួកយើងក្នុងការសាងសង់យន្តហោះជំនាន់ក្រោយដោយផ្អែកលើបច្ចេកវិទ្យាដែលប្រទេសជប៉ុនមាន ខណៈដែលនេះក៏រួមចំណែកដល់ការកាត់បន្ថយការបញ្ចេញកាបូននៅក្នុងការដឹកជញ្ជូនតាមផ្លូវអាកាសផងដែរ” ។
គម្រោងវិនិយោគសរុបដែលមានតម្លៃចំនួន ៥ ពាន់ពាន់លានយ៉េន ឬស្មើនឹង៣៣ ពាន់លានដុល្លារ ដើម្បីសាងសង់យន្តហោះជំនាន់ក្រោយដែលប្រើថាមពលដោយអ៊ីដ្រូសែន ឬប្រភពថាមពលជំនួស ។ ការប្រកាសនេះធ្វើឡើងស្របពេលដែលក្រុមហ៊ុន Boeing ព្យាយាមស្ដារទំនុកចិត្តលើយន្តហោះរបស់ខ្លួនឡើងមកវិញ ។
ការជំរុញថ្មីនេះក្នុងនឹងជួយជប៉ុនឲ្យផលិតបានយន្តហោះក្នុងស្រុកដំបូងក្រោយខកខានក្នុងរយៈពេលជាងកន្លះសតវត្សមកហើយ ។ ប្រទេសជប៉ុនបានផលិតយន្តហោះពាណិជ្ជកម្មដំបូងតាំងពីក្នុងឆ្នាំ ១៩៦២ ដែលមានឈ្មោះថា YS-11 turboprop ហើយត្រូវបានបិទបញ្ឈប់ការផលិតនៅប្រហែលមួយទសវត្សរ៍ក្រោយ ។
គម្រោងចុងក្រោយនេះនឹងចូលរួមដោយក្រុមហ៊ុនជប៉ុនជាច្រើនរួមទាំងក្រុមហ៊ុនផលិតរថយន្ត Subaru Corp., Mitsubishi Heavy និង Kawasaki Heavy Industries Ltd. និងក្រុមហ៊ុនផលិតគ្រឿងចក្រធុនធ្ងន់ IHI Corp., ទីភ្នាក់ងារអវកាសជប៉ុន ក៏ដូចជាអង្គការទាក់ទងនឹងថាមពលផងដែរ ។ Mitsubishi Heavy, Kawasaki Heavy Industries Ltd. និងក្រុមហ៊ុនផលិតផ្សេងទៀតគឺជាអ្នកផ្គត់ផ្គង់ដ៏សំខាន់ដល់ក្រុមហ៊ុន Boeing និងក្រុមហ៊ុនផលិតយន្តហោះផ្សេងទៀត រួមទាំងក្រុមហ៊ុន Airbus SE ផងដែរ។
Bloomberg
