ក្មេងដែលមានអាយុក្រោយ១៨ឆ្នាំនឹងអាចលេង TikTok បានត្រឹមតែ ១ម៉ោងប៉ុណ្ណោះក្នុងមួយថ្ងៃ ក្រោយ TikTok ធ្វើកំណែទម្រង់កម្មវិធីរបស់ខ្លួន

ក្រុមហ៊ុន TikTok របស់ចិនបានប្រកាសកាលពីថ្ងៃពុធថា TikTok នឹងធ្វើការកំណត់រយៈពេលប្រើប្រាស់តែមួយម៉ោងសម្រាប់អ្នកប្រើប្រាស់របស់ខ្លួនដែលមានអាយុក្រោម ១៨ ឆ្នាំនៅក្នុងការផ្លាស់ប្តូរមួយដើម្បីទប់ស្កាត់ចំនួនពេលវេលាដែលក្មេងជំទង់ចំណាយលើកម្មវិធីនេះ ។ TikTok បាននិយាយកាលពីថ្ងៃពុធថារាល់គណនីដែលគ្រប់គ្រងដោយអ្នកប្រើប្រាស់ដែលមានអាយុក្រោម ១៨ ឆ្នាំនឹងមានការកំណត់ពេលវេលាប្រើប្រាស់ត្រឹមតែ ៦០ នាទីប៉ុណ្ណោះក្នុងមួយថ្ងៃ ។ ក្រុមហ៊ុននេះបញ្ចេញពីការកំណត់ថ្មីនេះនៅក្នុងសប្តាហ៍ខាងមុខនេះ។

ការអាប់ដេតដែនកំណត់ប្រើប្រាស់ដែលត្រូវបានប្រកាសកាលពីថ្ងៃពុធ គឺដូចទៅនឹងច្បាប់លេងហ្គេមដែលរដ្ឋាភិបាលចិនបានដាក់លើមនុស្សវ័យក្មេងនៅក្នុងប្រទេសខ្លួន ។ នៅឆ្នាំ 2021 អាជ្ញាធរចិនបានចេញច្បាប់ថ្មីដែលកំណត់រយៈពេលដែលអនីតិជនអាចលេងហ្គេមអនឡាញត្រឹមតែមួយម៉ោងប៉ុណ្ណោះក្នុងមួយថ្ងៃ ហើយសម្រាប់តែថ្ងៃសុក្រ ចុងសប្តាហ៍ និងថ្ងៃបុណ្យជាតិ ដែលជាកិច្ចខិតខំប្រឹងប្រែងដើម្បីទប់ស្កាត់ការញៀនហ្គេមអ៊ីនធឺណិត ។

លោក Cormac Keenan ប្រធានផ្នែកទំនុកចិត្ត និងសុវត្ថិភាពនៅក្រុមហ៊ុន TikTok បាននិយាយនៅក្នុងប្លុកមួយកាលពីថ្ងៃពុធថា នៅពេលដែលកុមារលេង TikTok លេងដល់រយៈពេលកំណត់ ៦០ នាទី កុមារ និងក្មេងជំទង់នឹងត្រូវបានជំរុញឱ្យបញ្ចូលលេខសម្ងាត់ ដើម្បីបន្តមើល ដែលជាការរំខានដែល TikTok បាននិយាយថា អាចជំរុញឱ្យក្មេងជំទង់មានការគិតឡើងវិញអំពីពេលវេលាដែលពួកគេចំណាយលើកម្មវិធីនេះ ។ កម្មវិធី TikTok ក៏បាននិយាយផងដែរថា ក្មេងជំទង់ (១៣ – ១ ៩ឆ្នាំ) នឹងត្រូវបញ្ចូលលេខកូដសំងាត់មួយដើម្បីបន្តប្រើប្រាស់បន្ទាប់ពីផុត ១ ម៉ោងហើយ។ ឯក្មេងៗដែលមានអាយុក្រោម ១៣ ឆ្នាំនឹងតម្រូវឲ្យមានឪពុកម្តាយឬអាណាព្យាបាលកំណត់ឬបញ្ចូលលេខកូដសម្ងាត់ដើម្បីបន្ថែមពេលប្រើប្រាស់ ៣០ នាទីបន្ថែម។