សារព័ត៌មាន Wall Street Journal បានរាយការណ៍កាលពីថ្ងៃពុធថា រដ្ឋបាលរបស់ប្រធានាធិបតីអាម៉េរិក លោក ចូ បៃដិន បានបដិសេធសំណើរបស់ទីក្រុងគៀវ ក្នុងការស្នើសុំនូវយន្តហោះគ្មានមនុស្សបើកទំនើប ជុំវិញការព្រួយបារម្ភថា ការធ្វើដូច្នេះអាចធ្វើឲ្យជម្លោះអ៊ុយក្រែនកាន់តែតានតឹង នេះបើតាមកាសែត Wall Street Journal បានរាយការណ៍កាលពីថ្ងៃពុធ ។
យោងតាមមន្ត្រីអាម៉េរិក និងមនុស្សដែលដឹងពីបញ្ហាបាននិយាយថា សហរដ្ឋអាម៉េរិកនឹងមិនបញ្ជូនយន្តហោះដ្រូន Grey Eagle MQ-1C ទៅកាន់ប្រទេសអ៊ុយក្រែន ដែលខ្លួនបានស្នើសុំអស់រយៈពេលជាច្រើនខែនោះទេ ។ ពួកគេបាននិយាយថា ជំនួយយោធាប្រភេទនេះអាច “ផ្តល់សញ្ញាដល់ទីក្រុងម៉ូស្គូថា សហរដ្ឋអាម៉េរិកកំពុងផ្តល់សព្វាវុធ ដែលអាចកំណត់គោលដៅទីតាំងនៅក្នុងប្រទេសរុស្ស៊ី”។
របាយការណ៍បាននិយាយថា មន្ត្រីអាម៉េរិកក៏បារម្ភថា បច្ចេកវិទ្យាដែលប្រើក្នុងយន្តហោះគ្មានមនុស្សបើក ជាពិសេសកាមេរ៉ា អាចធ្លាក់ទៅក្នុងដៃសត្រូវ ។
នៅក្នុងខែកញ្ញា ក្រុមសមាជិកសភាអាម៉េរិកមួយក្រុម ត្រូវបានគេនិយាយថា បានទទូចឱ្យរដ្ឋបាលរបស់លោក បៃដិន បញ្ជូនទៅកាន់អ៊ុយក្រែននូវយន្តហោះគ្មានមនុស្សបើក ដែលអាចស្ថិតនៅលើអាកាសបានលើសពី 24 ម៉ោង ។
ប្រភព ៖ RT