អតីតប្រធានាធិបតីរុស្ស៊ី លោក Dmitry Medvedev បាននិយាយកាលពីថ្ងៃព្រហស្បតិ៍ថា សព្វាវុធណាមួយនៅក្នុងឃ្លាំងអាវុធរបស់ទីក្រុងមូស្គូ រួមទាំងអាវុធនុយក្លេអ៊ែរយុទ្ធសាស្ត្រ អាចត្រូវបានប្រើប្រាស់ដើម្បីការពារទឹកដីដែលភ្ជាប់ជាមួយរុស្ស៊ីពីអ៊ុយក្រែន។ នេះបើយោងតាមការចេញផ្សាយដោយសារព័ត៌មាន Reuters ។
លោក Medvedev ដែលមានតួនាទីជាអនុប្រធានក្រុមប្រឹក្សាសន្តិសុខរបស់រុស្ស៊ី បាននិយាយថា ការបោះឆ្នោតប្រជាមតិដែលគ្រោងធ្វើឡើងដោយអាជ្ញាធររុស្ស៊ីដែលបានដំឡើង និងបំបែកខ្លួននៅក្នុងតំបន់ដ៏ធំនៃទឹកដីអ៊ុយក្រែននឹងប្រព្រឹត្តទៅ ហើយ “មិនមានការថយក្រោយទេ” ។
“សាធារណរដ្ឋ Donbas (Donetsk និង Luhansk) និងទឹកដីផ្សេងទៀតនឹងត្រូវបានទទួលយកចូលទៅក្នុងប្រទេសរុស្ស៊ី” ។ លោក Medvedev បាននិយាយថា ការការពារទឹកដីទាំងអស់នឹងត្រូវបានពង្រឹងយ៉ាងខ្លាំងដោយកងកម្លាំងប្រដាប់អាវុធរុស្ស៊ី ដោយបន្ថែមថា “រុស្ស៊ីបានប្រកាសថា មិនត្រឹមតែសមត្ថភាពកេណ្ឌទ័ពប៉ុណ្ណោះទេ ថែមទាំងអាវុធរុស្ស៊ីណាមួយ រួមទាំងអាវុធនុយក្លេអ៊ែរយុទ្ធសាស្ត្រ និងអាវុធដោយផ្អែកលើគោលការណ៍ថ្មី អាចត្រូវបានប្រើប្រាស់សម្រាប់ការការពារតំបន់ទាំងនេះ”។
ការបោះឆ្នោតប្រជាមតិដែលនឹងធ្វើឡើងនៅក្នុងផ្នែកដែលគ្រប់គ្រងដោយរុស្ស៊ីនៃខេត្ត Donetsk, Luhansk, Kherson និង Zaporizhzhia របស់អ៊ុយក្រែន ក៏ដូចជាផ្នែកនៃខេត្ត Mykolaiv នឹងចាប់ពីថ្ងៃសុក្រនេះ ត្រូវបានគេរំពឹងយ៉ាងថានឹងផ្តល់លទ្ធផលយ៉ាងលើសលប់ក្នុងការចូលរួមជាមួយរុស្ស៊ី ។
ប្រសិនបើតំបន់ទាំងនេះបានចូលជាផ្លូវការទៅក្នុងសហព័ន្ធរុស្ស៊ី នោះទឹកដីទាំាំងនេះនឹងក្រោមគោលលទ្ធិនុយក្លេអ៊ែររបស់ក្រុងម៉ូស្គូនឹងមានសិទ្ធិទទួលបានការការពារពីអាវុធនុយក្លេអ៊ែររបស់រុស្ស៊ី ។
ទីក្រុងម៉ូស្គូមិនបានគ្រប់គ្រងពេញលេញណាមួយនៃតំបន់ទាំងបួនដែលវាត្រូវបានគេរំពឹងថានឹងព្យាយាមបញ្ចូលនោះទេ មានតែប្រហែល 60% នៃទីក្រុង Donetsk និង 66% នៃតំបន់ Zaporizhzhia ដែលកាន់កាប់ដោយកងទ័ពរុស្ស៊ី ។
