សមាជិកព្រឹទ្ធសភាអាម៉េរិកម្នាក់បានអំពាវនាវឱ្យមានការស៊ើបអង្កេតរបស់រដ្ឋាភិបាលលើផលប៉ះពាល់លើសន្តិសុខជាតិនៃការនាំចូលខ្ទឹមសពីប្រទេសចិន។ សមាជិកព្រឹទ្ធសភាមកពីគណបក្សសាធារណរដ្ឋ លោក Rick Scott បានសរសេរទៅកាន់លេខាធិការពាណិជ្ជកម្ម ដោយអះអាងថា ខ្ទឹមសចិនមិនមានសុវត្ថិភាព ដោយលើកឡើងពីវិធីសាស្រ្តផលិតគ្មានអនាម័យ។
ប្រទេសចិនគឺជាអ្នកនាំចេញខ្ទឹមសស្រស់ និងម្ទេសធំជាងគេបំផុតរបស់ពិភពលោក ហើយសហរដ្ឋអាម៉េរិកគឺជាអ្នកប្រើប្រាស់ដ៏សំខាន់។
នៅក្នុងសំបុត្ររបស់គាត់ ព្រឹទ្ធសមាជិក Scott សំដៅទៅលើកង្វល់ដែលមានស្រាប់ទាំងនេះ។ ប៉ុន្តែលោកបន្តគូសបញ្ជាក់អំពីការព្រួយបារម្ភខាងសុខភាពសាធារណៈយ៉ាងធ្ងន់ធ្ងរចំពោះគុណភាព និងសុវត្ថិភាពនៃខ្ទឹមសដែលដាំនៅបរទេស ជាពិសេសគឺខ្ទឹមដែលដាំនៅប្រទេសកុម្មុយនិស្តចិន ។ គាត់សំដៅលើការអនុវត្តដែលគាត់បានឃើញក្នុងវីដេអូអនឡាញ វីដេអូធ្វើម្ហូប និងភាពយន្តឯកសារ រួមទាំងការដាំខ្ទឹមសក្នុងទឹកស្អុយ។
លោកបានអំពាវនាវឱ្យក្រសួងពាណិជ្ជកម្មចាត់វិធានការក្រោមច្បាប់ដែលអនុញ្ញាតឱ្យមានការស៊ើបអង្កេតលើផលប៉ះពាល់នៃការនាំចូលជាក់លាក់លើសន្តិសុខរបស់សហរដ្ឋអាម៉េរិក ។ លោកអះអាងថា សុវត្ថិភាពចំណីអាហារ និងសន្តិសុខគឺជាភាពអាសន្នដែលអាចគំរាមកំហែងយ៉ាងធ្ងន់ធ្ងរដល់សន្តិសុខជាតិ សុខភាពសាធារណៈ និងវិបុលភាពសេដ្ឋកិច្ច ។
ការិយាល័យវិទ្យាសាស្ត្រ និងសង្គមនៅសាកលវិទ្យាល័យ McGill ក្នុងទីក្រុង Quebec បាននិយាយថា មិនមានភស្តុតាងណាមួយដែលថាទឹកស្អុយត្រូវបានប្រើប្រាស់ជាជីសម្រាប់ដាំខ្ទឹមនៅក្នុងប្រទេសចិននោះទេ ។
អត្ថបទដែលចេញផ្សាយដោយសាកលវិទ្យាល័យក្នុងឆ្នាំ 2017 បាននិយាយថា “កាកសំណល់មនុស្សមានប្រសិទ្ធភាពដូចជីដូចកាកសំណល់សត្វដែរ ។ ការពង្រាយទឹកស្អុយរបស់មនុស្សនៅលើវាលស្រែដែលដាំដំណាំវាមានសុវត្ថិភាពជាងអ្វីដែលអ្នកគិត” ។
BBC
