រដ្ឋមន្ត្រីហិរញ្ញវត្ថុថៃបាននិយាយថាសេដ្ឋកិច្ចរបស់ប្រទេសថៃកំពុងងើបឡើងវិញបន្តិចម្តងៗ

រដ្ឋមន្ត្រីហិរញ្ញវត្ថុថៃបាននិយាយកាលពីថ្ងៃពុធថា សេដ្ឋកិច្ចរបស់ប្រទេសថៃកំពុងងើបឡើងវិញបន្តិចម្តងៗ ប៉ុន្តែមានស្ថិរភាព ដែលត្រូវបានជំរុញដោយការស្ទុះងើបឡើងវិញនៅក្នុងវិស័យទេសចរណ៍ដ៏សំខាន់ដែលនឹងនៅតែជាកត្តាជំរុញដ៏សំខាន់នៃកំណើននៅឆ្នាំនេះ។

លោក Arkhom Termpittayapaisith បានប្រាប់វេទិកាសេដ្ឋកិច្ចថា ការចំណាយខ្ពស់ក្នុងឆ្នាំសារពើពន្ធបច្ចុប្បន្ន និងឆ្នាំបន្ទាប់ក៏នឹងបង្កើនការវិនិយោគផងដែរ។ ដោយលោកបន្តថា ភាពរឹងមាំនៃប្រាក់បាតបានជួយកាត់បន្ថយតម្លៃនាំចូល ប៉ុន្តែក៏កាត់បន្ថយបរិមាណនាំចេញផងដែរ ។

លោកក៏បានបន្ថែមថា គោលនយោបាយរូបិយវត្ថុ និងគោលនយោបាយសារពើពន្ធត្រូវតែធ្វើការរួមគ្នាដើម្បីធានាស្ថិរភាពសេដ្ឋកិច្ចរបស់ប្រទេស ដោយគោលនយោបាយរូបិយវត្ថុត្រូវតែមានលក្ខណៈសមរម្យ ហើយមិនបង្កើតការចំណាយហិរញ្ញវត្ថុនោះទេ។

គួរឱ្យដឹងដែរថា កាលពីថ្ងៃចន្ទ លោក Arkhom បានប្រាប់រ៉យទ័រថា សេដ្ឋកិច្ចរបស់ប្រទេសថៃអាចកើនឡើងលឿនជាងការព្យាករណ៍នៅឆ្នាំនេះ ដោយសារការងើបឡើងវិញនៃវិស័យទេសចរណ៍ ខណៈល្បឿននៃការរឹតបន្តឹងរូបិយវត្ថុដើម្បីទប់ទល់នឹងសម្ពាធអតិផរណានៅតែ សមហេតុផល។

គួររំលឹកផងដែរថា ធនាគារកណ្តាលថៃបានដំឡើងអត្រាការប្រាក់សំខាន់ៗចំនួន 1% ចាប់តាំងពីខែសីហាមកត្រឹម 1.50% ទោះបីជាវដ្ដនៃការរឹតបន្តឹងនេះមានភាពរង្គោះរង្គើតិចជាងបណ្តាប្រទេសក្នុងតំបន់របស់ខ្លួន ដោយសារការស្ទុះងើបឡើងនៃសេដ្ឋកិច្ចរបស់ប្រទេសថៃមានភាពយឺតយ៉ាវជាងប្រទេសអាស៊ីអាគ្នេយ៍ផ្សេងទៀតនោះ។