មីស៊ីលរុស្ស៊ីមួយគ្រាប់បានធ្លាក់នៅជិតប្រធានាធិបតីអ៊ុយក្រែន និងនាយករដ្ឋមន្ត្រីក្រិក តែប៉ុន្មានរយម៉ែត្រប៉ុណ្ណោះកាលពីថ្ងៃពុធ នៅពេលដែលមីស៊ីលសំដៅទៅវាយប្រហារក្នុងហេដ្ឋារចនាសម្ព័ន្ធកំពង់ផែនៅទីក្រុង Odesa សមុទ្រខ្មៅ។
លោកប្រធានាធិបតី វ៉ូឌីមៀរ ហេ្សលេនស្គី បានប្រាប់សន្និសីទសារព័ត៌មានមួយជាមួយនាយករដ្ឋមន្រ្តីក្រិកលោក Kyriakos Mitsotakis ថា យើងមិនត្រឹមតែបានឮសំឡេងផ្ទុះទេ ប៉ុន្តែយើងបានឃើញការវាយប្រហារនេះនៅថ្ងៃនេះ” ។ ប្រភពបាននិយាយថា ការវាយប្រហារបានកើតឡើងនៅចម្ងាយប៉ាន់ស្មានពី ៥០០ ទៅ ៨០០ ម៉ែត្រពីរថយន្តរបស់គណៈប្រតិភូប្រធានាធិបតីអ៊ុយក្រែន និងនាយករដ្ឋមន្រ្តីក្រិកលោក Kyriakos Mitsotakis ដែលកំពុងធ្វើទស្សនកិច្ចនៅទីក្រុងកំពង់ផែ Odesa ។
មនុស្ស៥នាក់ត្រូវបានសម្លាប់នៅក្នុងវាយប្រហារនោះ ខណៈលោកស្រី Natalia Humeniuk អ្នកនាំពាក្យនៃកងកម្លាំងការពារភាគខាងត្បូងរបស់ប្រទេសអ៊ុយក្រែនបាននិយាយថា វត្តមានរបស់មេដឹកនាំទាំងពីរគឺចៃដន្យចំពេលវាយប្រហាររបស់រុស្ស៊ី ។
នាយករដ្ឋមន្រ្តីក្រិកលោក Mitsotakis ក្នុងដំណើរទស្សនកិច្ចលើកដំបូងរបស់គាត់ទៅកាន់ប្រទេសចាប់តាំងពីការលុកលុយរបស់រុស្ស៊ីក្នុងខែកុម្ភៈ ឆ្នាំ ២០២២ បាននិយាយក្នុងអំឡុងពេលដំណើរទស្សនកិច្ចនេះថា គណៈប្រតិភូបានឮសំឡេងស៊ីរ៉ែន និងការផ្ទុះដ៏ធំមួយនៅពេលពួកគេធ្វើដំណើរឆ្ពោះទៅកាន់រថយន្តរបស់ពួកគេ ។
ភ្លាមៗក្រោយវាយប្រហារក្រសួងការពារជាតិរុស្ស៊ីបានចេញមកអះអាងថា កងទ័ពរបស់ខ្លួនពិតជាបានវាយប្រហារលើឃ្លាំងផ្ទុកយន្តហោះគ្មានមនុស្សបើករបស់កងទ័ពជើងទឹកអ៊ុយក្រែននៅក្នុងកំពង់ផែ ដោយបន្ថែមថា គោលដៅត្រូវបានកម្ទេច ។
Reuters
