សារព័ត៌មាន New York Times បានរាយការណ៍ថា ទីភ្នាក់ងារស៊ើបការណ៍សម្ងាត់អាម៉េរិកបានវាយតម្លៃថា ទីក្រុងម៉ូស្គូកំពុងទិញគ្រាប់កាំភ្លើងធំពីប្រទេសកូរ៉េខាងជើង នេះបើយោងតាមការចេញផ្សាយដោយសារព័ត៌មាន Reuters ។
មន្ត្រីរដ្ឋាភិបាលអាម៉េរិកបានប្រាប់កាសែត Times ថា ការទិញនេះបង្ហាញថា ទណ្ឌកម្មបានចាប់ផ្តើមខាំ និងកាត់បន្ថយសមត្ថភាពរបស់រុស្ស៊ីក្នុងការរក្សាការឈ្លានពានរបស់ខ្លួនលើអ៊ុយក្រែន ដែលទីក្រុងម៉ូស្គូបានហៅថាជា “ប្រតិបត្តិការយោធាពិសេស”។
ថ្មីៗនេះ អ៊ុយក្រែនបានបើកការវាយលុកនៅទីតាំងជាច្រើន រួមទាំងជុំវិញទីក្រុង Kherson ដែលរុស្ស៊ីបានកាន់កាប់តាំងពីដើមដំបូងនៃការលុកលុយ ។ ក្នុងការត្រៀមខ្លួនសម្រាប់ការវាយប្រហារទាំងនោះ កងកម្លាំងអ៊ុយក្រែនបានវាយប្រហារឃ្លាំងផ្ទុកអាវុធរបស់រុស្ស៊ី រួមទាំងកន្លែងដែលមានកាំភ្លើងធំ និងគ្រាប់រំសេវ ។
ក្រុមមន្ត្រីបាននិយាយថា ទណ្ឌកម្មរបស់លោកខាងលិចកំពុងតែបំផ្លាញសមត្ថភាពរបស់រុស្ស៊ីក្នុងការជំនួសយានជំនិះ និងសព្វាវុធដែលត្រូវបានបំផ្លាញក្នុងប្រទេសអ៊ុយក្រែន ។