ក្រុមរដ្ឋអ៊ីស្លាម ISIS បានអះអាងថា ខ្លួនទទួលខុសត្រូវចំពោះការបំផ្ទុះគ្រាប់បែកអត្តឃាតកាលពីថ្ងៃចន្ទនៅទីក្រុងកាប៊ុល ។ ការបំផ្ទុះបានកើតឡើងនៅមិនឆ្ងាយប៉ុន្មានពីច្រកចូលស្ថានទូតរុស្ស៊ីក្នុងរដ្ឋធានីអាហ្វហ្គានីស្ថានហើយបានសម្លាប់មនុស្ស 25 នាក់ រួមទាំងបុគ្គលិកស្ថានទូតពីរនាក់ផងដែរ ។ នេះបើយោងតាមការចេញផ្សាយដោយសារព័ត៌មាន RT ។
ក្រុមភេរវករបានអះអាងថា ការវាយប្រហារនេះធ្វើឡើងដោយអ្នកប្រយុទ្ធបរទេស ។ យោងតាមរបាយការណ៍មួយចំនួនបានអះអាងថា ការវាយប្រហារនេះធ្វើឡើងដោយក្រុមរដ្ឋអ៊ីស្លាមក្នុងស្រុក ISIS-K ។
វាគឺជាការវាយប្រហារលើកដំបូងលើបេសកកម្មការទូតនៅក្នុងប្រទេសអាហ្វហ្គានីស្ថានដែលត្រូវបានអះអាងដោយក្រុម ISIS ចាប់តាំងពីការកាន់កាប់របស់ពួកតាលីបង់ឆ្នាំ 2021 ។ មុននេះ គណៈកម្មាធិការស៊ើបអង្កេតរុស្ស៊ីបានបញ្ជាក់ថា ជំនួយការលេខាម្នាក់ និងសន្តិសុខម្នាក់ ទាំងជនជាតិរុស្ស៊ី ត្រូវបានសម្លាប់នៅក្នុងការបំផ្ទុះនេះ ។
យោងតាមរបាយការណ៍របស់ប្រព័ន្ធផ្សព្វផ្សាយ ជនរងគ្រោះភាគច្រើនជាជនជាតិអាហ្វហ្គានីស្ថានកំពុងតម្រង់ជួរសម្រាប់ទិដ្ឋាការ ។