នាយករដ្ឋមន្ត្រីថៃលោក សេដ្ឋា ថាវីស៊ីន នឹងបរិច្ចាគប្រាក់បៀវត្សរ៍ជានាយករដ្ឋមន្រ្តីរបស់គាត់ និងប្រាក់ឧបត្ថម្ភផ្សេងៗទៀតដែលគាត់ទទួលបានទៅអង្គការសប្បុរសធម៌ ។ អ្នកនាំពាក្យរដ្ឋាភិបាលលោក Chai Wacharonke បាននិយាយនៅក្នុងសេចក្តីថ្លែងការណ៍មួយថា ប្រាក់ខែ និងប្រាក់ឧបត្ថម្ភប្រជុំរបស់លោក សេដ្ឋា ថាវីស៊ីន នឹងត្រូវបញ្ជូនបន្តផ្តល់ទៅដល់មូលនិធិផ្សេងៗ សម្រាប់ក្រុមងាយរងគ្រោះក្នុងប្រទេស ដោយចាប់ផ្តើមពី ‘មូលនិធិកុមារ’ ដំបូង ។

កូរ៉េខាងជើងកាលពីថ្ងៃចន្ទបានហៅប្រធានាធិបតីកូរ៉េខាងត្បូងលោក Yoon Suk Yeol ថាជា “បុរសដែលមានខួរក្បាលដូចសំរាម” និង “មនុស្សល្ងង់ខាងការទូត” ខណៈដែលកូរ៉េខាងជើងបានស្តីបន្ទោសមេដឹកនាំកូរ៉េខាងត្បូងចំពោះការប្រើសុន្ទរកថារបស់អង្គការសហប្រជាជាតិ ដើម្បីចេញការព្រមានអំពីទំនាក់ទំនងយោធាកាន់តែស៊ីជម្រៅរបស់កូរ៉េខាងជើងជាមួយរុស្ស៊ី ។   នៅក្នុងសុន្ទរកថានៅឯមហាសន្និបាតអង្គការសហប្រជាជាតិកាលពីសប្តាហ៍មុន លោក Yoon បាននិយាយថា កូរ៉េខាងត្បូង​នឹងមិនអង្គុយស្ងៀមទេ ប្រសិនបើកូរ៉េខាងជើង និងរុស្ស៊ីយល់ព្រមលើកិច្ចព្រមព្រៀងអាវុធដែលនឹងបង្កការគំរាមកំហែងដល់កូរ៉េខាងត្បូង ។