២០២៣ ជាឆ្នាំដែលមានសុវត្ថិភាពបំផុតមិនធ្លាប់មានក្នុងវិស័យអាកាសចរណ៍

សមាគមដឹកជញ្ជូនផ្លូវអាកាសអន្តរជាតិ IATA បាននិយាយថា កាលពីឆ្នាំមុនគឺឆ្នាំដែលវិស័យអាកាសចរណ៍មានសុវត្ថិភាពបំផុតមិនធ្លាប់មានសម្រាប់ការហោះហើរពាណិជ្ជកម្មដោយវិធានការមួយចំនួន ដោយមិនមានគ្រោះថ្នាក់ដល់ជីវិតដែលពាក់ព័ន្ធនឹងយន្តហោះដឹកអ្នកដំណើរក្នុងជើងហោះហើរចំនួន ៣៧,៧ លានជើងនៅទូទាំងពិភពលោក ។

មិនមានការបាត់បង់យន្តហោះដឹកអ្នកដំណើរត្រូវបានកត់ត្រាទុកនោះទេនៅឆ្នាំ ២០២៣ ។ តាមការប្រៀបធៀប មានឧបទ្ទវហេតុធ្លាក់យន្តហោះមួយបានកើតឡើងក្នុងឆ្នាំ ២០២២ ។ សរុបមក អត្រាគ្រោះថ្នាក់បានធ្លាក់ចុះមកនៅត្រឹមមួយក្នុងរៀងរាល់ ១,២៦ លានជើងហោះហើរកាលពីឆ្នាំមុន ដែលជាកម្រិតទាបបំផុតក្នុងរយៈពេលជាងមួយទសវត្សរ៍ ។

របាយការណ៍សុវត្ថិភាពប្រចាំឆ្នាំរបស់ IATA បានចេញផ្សាយបន្ទាប់ពីការចាប់ផ្តើមដ៏គួរឱ្យភ្ញាក់ផ្អើលក្នុងឆ្នាំ ២០២៤ ដែលបានឃើញឧប្បត្តិហេតុគ្រោះថ្នាក់ដោយយន្តហោះធ្ងន់ធ្ងរនៅក្នុងប្រទេសជប៉ុន និងសហរដ្ឋអាម៉េរិក។ ការបុកគ្នានៅលើផ្លូវរត់កាលពីថ្ងៃទី ២ ខែមករា រវាងយន្តហោះ A350 ដំណើរការដោយក្រុមហ៊ុន Japan Airlines និងយន្តហោះឆ្មាំសមុទ្រនៅអាកាសយានដ្ឋាន Haneda បានសម្លាប់នាវិក ៥ នាក់នៅលើយន្តហោះឆ្មាំសមុទ្រ ។ ប៉ុន្មានថ្ងៃក្រោយមក ទ្វារមួយនៅលើយន្តហោះ Boeing Co. 737 Max 9 របស់ក្រុមហ៊ុនអាកាសចរណ៍ Alaska Airline បានផ្ទុះដាច់ចេញពីយន្តហោះភ្លាមៗបន្ទាប់ពីការហោះឡើង ទោះបីជាមិនមានអ្នកស្លាប់នៅក្នុងឧបទ្ទវហេតុនោះក៏ដោយ ។

ហានិភ័យគឺខ្ពស់សម្រាប់អ្នកដំណើរនៅលើយន្តហោះ turboprop ជាងនៅលើយន្តហោះពាណិជ្ជកម្មកាលពីឆ្នាំមុន ។ សូម្បីតែនៅឆ្នាំមុនក៏មានឧបទ្ទវហេតុធ្លាក់យន្តហោះតែមួយគត់ គឺយន្តហោះ turboprop មួយបានធ្លាក់ក្នុងប្រទេសនេប៉ាល់ ដោយបានសម្លាប់មនុស្ស ៧២នាក់។