សហរដ្ឋអាម៉េរិក និងសម្ពន្ធមិត្តបានរៀបចំផែនការដាក់ទណ្ឌកម្មថ្មីប្រឆាំងនឹងអ៊ីរ៉ង់ក្រោយការវាយប្រហារដែលមិនធ្លាប់មានពីមុនមកលើអ៊ីស្រាអែលដែលជាសម្ពន្ធមិត្តរបស់លោកខាងលិច ខណៈដែលគណៈរដ្ឋមន្ត្រីអ៊ីស្រាអែលគ្រោងនឹងជួបពិភាក្សាគ្នាជាលើកទីបីនៅថ្ងៃពុធនេះ ដើម្បីសម្រេចចិត្តពីការឆ្លើយតបលើអ៊ីរ៉ង់ ។
ខណៈពេលដែលការវាយប្រហារកាលពីយប់ថ្ងៃសៅរ៍មិនបណ្តាលឱ្យមនុស្សស្លាប់ និងការខូចខាតតិចតួច ដោយសារប្រព័ន្ធការពារដែនអាកាស និងវិធានការតបតរបស់អ៊ីស្រាអែល និងសម្ពន្ធមិត្ត វាបានបង្កើនការភ័យខ្លាចថា អំពើហឹង្សាដែលកើតចេញពីសង្រ្គាមហ្កាហ្សារយៈពេលប្រាំមួយខែកំពុងរីករាលដាល ជាមួយនឹងហានិភ័យនៃសង្រ្គាមបើកចំហរវាងអ៊ីរ៉ង់ និងអ៊ីស្រាអែល។
ដោយសង្ឃឹមថានឹងបញ្ចៀសអ៊ីស្រាអែលឱ្យរួចផុតពីការសងសឹកទ្រង់ទ្រាយធំ សហរដ្ឋអាម៉េរិក និងអឺរ៉ុបបានបន្ថែមការរឹតបន្តឹងទណ្ឌកម្មសេដ្ឋកិច្ច និងនយោបាយប្រឆាំងនឹងអ៊ីរ៉ង់។ ទីប្រឹក្សាសន្តិសុខជាតិអាម៉េរិកលោក Jake Sullivan បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា សហរដ្ឋអាម៉េរិកគ្រោងនឹងដាក់ទណ្ឌកម្មថ្មីដែលផ្តោតលើកម្មវិធីមីស៊ីល និងយន្តហោះគ្មានមនុស្សបើករបស់អ៊ីរ៉ង់នៅប៉ុន្មានថ្ងៃខាងមុខនេះ ហើយរំពឹងថាសម្ពន្ធមិត្តរបស់ខ្លួននឹងធ្វើតាមដែរ ។
ចំណែករដ្ឋមន្ត្រីការបរទេសអ៊ីស្រាអែលក៏បានស្នើទៅកាន់ប្រទេសចំនួន 32 ដើម្បីសុំឱ្យពួកគេដាក់ទណ្ឌកម្មលើកម្មវិធីមីស៊ីលរបស់អ៊ីរ៉ង់ និងធ្វើតាមទីក្រុងវ៉ាស៊ីនតោន ក្នុងការចាត់តាំងកងឆ្មាំបដិវត្តន៍អ៊ីរ៉ង់ជាក្រុមភេរវករ។
Reuters
