សហរដ្ឋអាម៉េរិកបានបោះឆ្នោតប្រឆាំងនឹងដំណោះស្រាយដែលទទួលការគាំទ្រយ៉ាងច្រើននៅក្រុមប្រឹក្សាសន្តិសុខអង្គការសហប្រជាជាតិ (UNSC) ដែលនឹងត្រួសត្រាយបើកផ្លូវឱ្យរដ្ឋប៉ាឡេស្ទីនទទួលបានសមាជិកភាពពេញលេញនៅអង្គការសហប្រជាជាតិ។
ប្រទេសចំនួន ១២ នៅក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតគាំទ្រដំណោះស្រាយនេះ ខណៈដែលប្រទេសចំនួនពីរផ្សេងទៀតគឺចក្រភពអង់គ្លេស និងស្វីសបានបោះឆ្នោតអនុប្បវាទ ឯអាម៉េរិកបោះឆ្នោតប្រឆាំងតែឯង ។
បន្ទាប់ពីបានប្រឆាំងវិធានការនេះ បេសកជនរងរបស់សហរដ្ឋអាម៉េរិកប្រចាំអង្គការសហប្រជាជាតិ លោក Robert Wood បាននិយាយថា ទីក្រុងវ៉ាស៊ីនតោន ជឿជាក់ថា គ្មានផ្លូវផ្សេងទៀតទៅកាន់ភាពជារដ្ឋរបស់ប៉ាឡេស្ទីន ក្រៅពីតាមរយៈការចរចារវាងអ៊ីស្រាអែល និងប៉ាឡេស្ទីននោះទេ ។ ដំណោះស្រាយនេះត្រូវបានរំពឹងទុករួចទៅហើយថានឹងបរាជ័យ ដោយសារសហរដ្ឋអាម៉េរិក ដែលជាសម្ពន្ធមិត្តដ៏រឹងមាំបំផុតរបស់អ៊ីស្រាអែល មានអំណាចវេតូនៅក្រុមប្រឹក្សាសន្តិសុខ ។
រដ្ឋប៉ាឡេស្ទីនបច្ចុប្បន្នជាអ្នកសង្កេតការណ៍មិនមែនជាសមាជិករបស់អង្គការសហប្រជាជាតិទេ ។ ប៉ុន្តែពាក្យស្នើសុំចូលជាសមាជិកពេញសិទ្ធិរបស់អង្គការសហប្រជាជាតិនឹងត្រូវអនុម័តដោយក្រុមប្រឹក្សាសន្តិសុខ ហើយបន្ទាប់មកទទួលបានសំឡេងគាំទ្រយ៉ាងតិចពីរភាគបីពីមហាសន្និបាតអង្គការសហប្រជាជាតិ ។
ឯកអគ្គរដ្ឋទូតអ៊ីស្រាអែលប្រចាំអង្គការសហប្រជាជាតិ លោក Gilad Erdan បានហៅអាជ្ញាធរប៉ាឡេស្ទីន (PA) ថាជា “អង្គភាពស្រឡាញ់អំពើប្រល័យពូជសាសន៍ ដែលមិនសមនឹងទទួលបានឋានៈណាមួយ” នៅក្នុងអង្គការសហប្រជាជាតិ ដែលតម្រូវឱ្យបេក្ខជនថ្មីជាប្រទេស “ស្រឡាញ់សន្តិភាព” ។
លោកបានអះអាងបន្ថែមទៀតថា PA មិនមានសិទ្ធិអំណាចលើតំបន់ហ្គាហ្សា និងផ្នែកខ្លះនៃតំបន់ West Bank នោះទេ។ “អញ្ចឹងតើ UN នឹងទទួលស្គាល់អ្នកណា? តើអ្នកណានឹងទទួលបន្ទុក?” ។
Al Jazeera