ជើងហោះហើរមួយចេញពីប្រទេសរុស្ស៊ីបានលក់អស់យ៉ាងឆាប់រហ័សនៅថ្ងៃពុធ បន្ទាប់ពីប្រធានាធិបតី វ្ល៉ាឌីមៀរ ពូទីន ប្រកាសបញ្ជូនទ័ព ៣០០,០០០នាក់បន្ថែមទៀតទៅប្រយុទ្ធនៅអ៊ុយក្រែន ។ នេះបើយោងតាមការចេញផ្សាយដោយសារព័ត៌មាន Reuters ។
ការប្រកាសរបស់លោក ពូទីន ដែលធ្វើឡើងនៅក្នុងសុន្ទរកថាតាមកញ្ចក់ទូរទស្សន៍នាពេលព្រឹកព្រលឹម បានលើកឡើងពីការភ័យខ្លាចថា បុរសខ្លះដែលគ្រប់អាយុប្រយុទ្ធនឹងមិនត្រូវបានអនុញ្ញាតឱ្យចាកចេញពីប្រទេសរុស្ស៊ីនោះទេ។
ទោះជាយ៉ាងណាក៏ដោយ ទិន្នន័យ Google Trends បានបង្ហាញពីការកើនឡើងនៃការស្វែងរកវេបសាយ Aviasales ដែលជាវេបសាយដ៏ពេញនិយមបំផុតរបស់រុស្ស៊ីសម្រាប់ការទិញសំបុត្រយន្តហោះ ។
ជើងហោះហើរត្រង់ពីទីក្រុងម៉ូស្គូទៅកាន់ទីក្រុងអ៊ីស្តង់ប៊ុលក្នុងប្រទេសទួរគី និង Yerevan ក្នុងប្រទេសអាមេនី ដែលជាគោលដៅទាំងពីរដែលអនុញ្ញាតឱ្យជនជាតិរុស្ស៊ីចូលដោយគ្មានទិដ្ឋាការត្រូវបានលក់អស់នៅថ្ងៃពុធ នេះបើយោងតាមទិន្នន័យរបស់ Aviasales ។