ប្រធានាធិបតីចិនលោក ស៊ី ជីនពីង នឹងចាប់ផ្តើមដំណើរទស្សនកិច្ចនៅក្រៅប្រទេស នៅថ្ងៃនេះ (14 កញ្ញា 2022) ដែលជាដំណើរចេញទៅក្រៅប្រទេសដំបូងបង្អស់របស់លោក រាប់ចាប់តាំងពីការផ្ទុះឡើងនៃមេរោគឆ្លងកូវីដ-19 នៅដើមឆ្នាំ2020 ដើម្បីធ្វើជំនួបជាមួយប្រធានាធិបតីរុស្ស៊ីលោក វ្ល៉ាឌីមៀរ ពូទីន ។
លោក ស៊ី ជីនពីង នឹងចាប់ផ្តើមការធ្វើដំណើរទស្សនកិច្ចទៅកាន់ប្រទេស កាហ្សាក់ស្ថាន មុនពេលលោក ចូលរួមកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO) នៅទីក្រុង Samarkand ប្រទេស Uzbekistan ចាប់ពីថ្ងៃទី 15-16 ខែកញ្ញា ជាមួយថ្នាក់ដឹកនាំបណ្ដាប្រទេសក្នុងតំបន់នៅអាស៊ីកណ្តាល ក្នុងនោះរួមមានរុស្ស៊ី អ៊ីរ៉ង់ ឥណ្ឌា និងប៉ាគីស្ថាន ក៏បានចូលរួមកិច្ចប្រជុំនេះផងដែរ ។
ជំនួបរវាងអ្នកទាំងពីរ នឹងផ្តល់ឱកាសឱ្យលោក ស៊ី ជីនពីង បានបង្ហាញអំពីឥទ្ធិពលរបស់ចិន ខណៈពេលដែលលោក ពូទីន ក៏អាចបង្ហាញជាអន្តរជាតិនូវជំហររបស់រុស្ស៊ីចំពោះអាស៊ី ។ ទន្ទឹមនឹងនេះដែរ មេដឹកនាំទាំងពីរក៏បានបង្ហាញជំហរប្រឆាំងទៅនឹងឥទ្ធិពលរបស់សហរដ្ឋអាម៉េរិក និងអាកប្បកិរិយារបស់ប្រទេសលោកខាងលិច សម្រាប់ការព្យាយាមដាក់ទណ្ឌកម្មរុស្ស៊ី ចំពោះសង្គ្រាមរបស់ខ្លួននៅអ៊ុយក្រែន ដែលរដ្ឋាភិបាលរបស់វិមានក្រឹមឡាំងហៅថា ‘ជាប្រតិបត្តិការពិសេសយោធា’ របស់ខ្លួន ។
