ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានអនុម័ត “គោលការណ៍ការបរទេសថ្មី” ដែលមានកម្រាស់ 31ទំព័រ ដែលគេហៅថា “Russian World” ។ គោលការណ៍នេះ គឺជាមនោគមន៍វិជ្ជាបែបអភិរក្សនិយម សំដៅ “ការការពារ គ្រប់គ្រង លើកតម្កើនទំនៀមទំលាប់វប្បធម៍ និងផ្នត់គំនិតជាតិ” ។ នេះបើយោងតាមការចេញផ្សាយដោយសារព័ត៌មាន Reuters ។
រុស្ស៊ីគាំទ្រអ្នកស្នេហាជាតិ ទាំងពលរដ្ឋខ្លួនដែលរស់នៅក្រៅប្រទេស ក្នុងការអនុវត្តសិទ្ធិរបស់ពួកគេដោយពេញលេញ ដើម្បីធានាថា ទទួលបានការពាររាល់ផលប្រយោជន៍ និងរក្សាបាននូវអត្តសញ្ញាណវប្បធម៌របស់រុស្ស៊ី ព្រោះរឿងនេះជាចំណែកដ៏សំខាន់ ក្នុងការបង្កើនភាពរឹងមាំរបស់រុស្ស៊ីនៅលើឆាកអន្តរជាតិ ។
ខ្លឹមសារនៃឯកសារនេះក៏បញ្ជាក់ថា រុស្ស៊ីត្រូវបានគេចាត់ទុកថា ជាអតីតប្រទេសសហភាពសូវៀត រាប់ចាប់ពីសមុទ្របាល់ទិកដល់តំបន់អាស៊ីកណ្តាល គឺជា “តំបន់ស្ថិតក្នុងឥទ្ធិពលរបស់ខ្លួនដោយស្របច្បាប់” ។
ស្របពេលជាមួយគ្នានេះដែរ រុស្ស៊ីក៏បានបង្កើនកិច្ចសហប្រតិបត្តិការជាមួយបណ្តាប្រទេស Slavic ចិន និងឥណ្ឌា រហូតបានពង្រីកវិសាលភាពនៃកិច្ចសហប្រតិបត្តិការជាមួយតំបន់មជ្ឈិមបូព៌ា អាម៉េរិកឡាទីន និងតំបន់អាហ្វ្រិកផងដែរ ។
