ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយនៅថ្ងៃចន្ទនេះថា ប្រទេសរុស្ស៊ីនឹងឆ្លើយតបយ៉ាងខ្លាំងក្លាបំផុត ប្រសិនបើរបបក្រុងគៀវ នៅតែបន្តការប៉ុនប៉ងធ្វើការវាយប្រហារភេរវកម្មលើទឹកដីរុស្ស៊ី ។
លោក ពូទីន បាននិយាយនៅក្នុងកិច្ចប្រជុំជាមួយសមាជិកក្រុមប្រឹក្សាសន្តិសុខរុស្ស៊ីថា “ប្រសិនបើការប៉ុនប៉ងបន្តធ្វើការវាយប្រហារភេរវកម្មលើទឹកដីរបស់យើង ការឆ្លើយតបរបស់រុស្ស៊ីនឹងមានភាពខ្លាំងក្លាបំផុត ហើយតាមវិសាលភាពរបស់ពួកគេត្រូវគ្នាទៅនឹងកម្រិតនៃការគំរាមកំហែងដែលបានបង្កើតឡើងសម្រាប់សហព័ន្ធរុស្ស៊ី”។
លោកពូទីនបានសង្កត់ធ្ងន់ថា “គ្មាននរណាម្នាក់ត្រូវមានការសង្ស័យអំពីរឿងនេះទេ” ។
មេដឹកនាំរុស្ស៊ីបាននិយាយថា តាមរយៈទង្វើរបស់ខ្លួន របបក្រុងគៀវ បានធ្វើឱ្យខ្លួនមានលក្ខណៈស្មើរនឹងអង្គការភេរវករអន្តរជាតិ ហើយដូច្នេះ ឧក្រិដ្ឋកម្មទាំងនេះមិនអាចទុកចោលដោយគ្មានចម្លើយឡើយ ។
ដូចដែលលោក ពូទីនបាននិយាយថា “នៅព្រឹកនេះ តាមសំណើរបស់ក្រសួងការពារជាតិ និងក្រោមផែនការរបស់អគ្គសេនាធិការរុស្ស៊ី ការវាយប្រហារដ៏ធំដោយអាវុធរយៈចម្ងាយឆ្ងាយ តាមផ្លូវអាកាស សមុទ្រ និងដីគោករបស់រុស្ស៊ី ត្រូវបានបញ្ជូនប្រឆាំងនឹងតីតាំងថាមពលរបស់អ៊ុយក្រែន។
ប្រធានាធិបតីបានណែនាំរដ្ឋមន្ត្រីការពារជាតិឱ្យរាយការណ៍អំពីលទ្ធផលនៃការវាយប្រហារនេះ »។
ប្រភព ៖ TASS
