រុស្ស៊ីបាញ់មីស៊ីលសំដៅលើទឹកដីអ៊ុយក្រែនសម្លាប់ជនស៊ីវិល ៥១ នាក់ដែលជាការវាយប្រហារសម្លាប់ជនស៊ីវិលច្រើនបំផុតមិនធ្លាប់មាន

ចាប់តាំងពីការចាប់ផ្តើមនៃការលុកលុយយ៉ាងពេញទំហឹងរបស់ខ្លួនលើអ៊ុយក្រែន យោធារុស្ស៊ីបានបាញ់មីស៊ីលម្តងហើយម្តងទៀត សំដៅគោលដៅជនស៊ីវិលនៅទូទាំងប្រទេស ជាមួយនឹងផលវិបាកដ៏អាក្រក់ ។

ការវាយប្រហារដ៏សាហាវ និងចុងក្រោយបំផុតមួយបានកើតឡើងកាលពីថ្ងៃព្រហស្បតិ៍មិ្សលមិញ នៅពេលដែលប្រធានាធិបតី វ៉ូឡូឌីមៀរ ហ្សេលេនស្គី និងមន្ត្រីកំពូលផ្សេងទៀតនៅក្នុងទីក្រុងគៀវបានរាយការណ៍ថា រ៉ុក្កែតរុស្ស៊ីបានវាយប្រហារហាងកាហ្វេ និងហាងលក់ទំនិញមួយកន្លែងនៅក្នុងភូមិ Hroza ក្នុងតំបន់ Kharkiv ភាគខាងកើតអ៊ុយក្រែន ដោយបានសម្លាប់ជនស៊ីវិលយ៉ាងហោចណាស់ ៥១ នាក់ ។

លោក ហ្សេលេនស្គី បានហៅការវាយប្រហារនេះថា “ជាការវាយប្រហារដោយគ្មានសេចក្ដីមេត្តាទាល់តែសោះ” នៅក្នុងវីដេអូរបស់គាត់ ។ លោក ហ្សេលេនស្គី បន្តថា “ការវាយប្រហារដោយកាំជ្រួចនេះជាការវាយប្រហារដោយចេតនាទៅលើភូមិមួយក្នុងតំបន់ Kharkiv នៅលើហាងទំនិញ និងហាងកាហ្វេ” ។

មន្ត្រីក្នុងតំបន់បានប្រាប់ទូរទស្សន៍សាធារណៈ Suspilne ថា ការវាយប្រហារនេះគឺជាការវាយប្រហារដ៏សាហាវបំផុតនៅក្នុងតំបន់ Kharkiv ចាប់តាំងពីការឈ្លានពានរបស់រុស្ស៊ីកាលពីជាង ១៩ ខែមុនមក ។ វាក៏ហាក់ដូចជាការស្លាប់របស់ជនស៊ីវិលដ៏ធំបំផុតមួយនៅក្នុងការវាយប្រហារណាមួយរបស់រុស្ស៊ី ។ ប៉ូលិសក្នុងតំបន់បានប្រាប់ទូរទស្សន៍ជាតិថា ចំនួនអ្នកស្លាប់មានចំនួន ៥១ នាក់ ក្នុងនោះ ៦ នាក់រងរបួស និង៣នាក់បាត់ខ្លួន ។

នៅព្រឹកព្រលឹមថ្ងៃសុក្ររុស្ស៊ីបានបើកការវាយប្រហារជាថ្មីដោយបាញ់បង្ហោះដ្រូន និងមីស៊ីលថ្មីដោយបានសម្លាប់ក្មេងប្រុសអាយុ ១០ ឆ្នាំម្នាក់នៅភាគឦសាននៃទីក្រុង Kharkiv និងបំផ្លាញហេដ្ឋារចនាសម្ព័ន្ធកំពង់ផែនៅតំបន់ Odesa នៅភាគខាងត្បូងធ្វើឱ្យខូចខាតគ្រាប់ធញ្ញជាតិ ។

ទីក្រុងម៉ូស្គូមិនបានធ្វើអត្ថាធិប្បាយភ្លាមៗអំពីព្រឹត្តិការណ៍នៅ Hroza នោះទេ ប៉ុន្តែទីក្រុងម៉ូស្គូតែងតែបានបដិសេធការកំណត់គោលដៅជនស៊ីវិល ។

Reuters