យោងតាមទូរទស្សន៍រដ្ឋបានឱ្យដឹងថា គណៈកម្មាធិការរៀបចំការបោះឆ្នោតដែលគ្រប់គ្រងដោយយោធារបស់ប្រទេសមីយ៉ាន់ម៉ាបានប្រកាសថា គណបក្សរបស់មេដឹកនាំលោកស្រីអ៊ុងសាន ស៊ូជី នឹងត្រូវរំលាយចោល ដោយសារបរាជ័យក្នុងការចុះឈ្មោះឡើងវិញក្រោមច្បាប់បោះឆ្នោតថ្មី ។
ទូរទស្សន៍ Myawaddy TV បាននិយាយនៅក្នុងព្រឹត្តិបត្រមួយកាលពីល្ងាចថ្ងៃអង្គារថា គណបក្សសម្ព័ន្ធជាតិដើម្បីប្រជាធិបតេយ្យ (NLD) ស្ថិតក្នុងចំណោមគណបក្សនយោបាយចំនួន ៤០ ដែលខកខានមិនបានបំពេញតាមកាលបរិច្ឆេទនៃការចុះឈ្មោះរបស់យោធាដែលកំពុងកាន់អំណាចសម្រាប់ការបោះឆ្នោត ។
កាលពីខែមករា យោធាបានផ្តល់ពេលពីរខែដល់គណបក្សនយោបាយដើម្បីចុះឈ្មោះឡើងវិញក្រោមច្បាប់បោះឆ្នោតថ្មីដ៏តឹងរឹងមួយ មុនពេលការបោះឆ្នោតថ្មីដែលខ្លួនបានសន្យាថានឹងរៀបចំ ប៉ុន្តែដែលគូប្រជែងរបស់ខ្លួននិយាយថានឹងមិនសេរី ឬយុត្តិធម៌។
គណបក្ស NLD បាននិយាយថា ខ្លួននឹងមិនប្រកួតប្រជែងអ្វីដែលគេហៅថាការបោះឆ្នោតមិនស្របច្បាប់នោះទេ ។
លោក Bo Bo Oo សមាជិកសភាជាប់ឆ្នោតម្នាក់មកពីគណបក្សរបស់លោកស្រីស៊ូជីបានថ្លែងថា៖ «យើងមិនទទួលយកជាដាច់ខាតដែលការបោះឆ្នោតនឹងត្រូវធ្វើឡើងនៅពេលដែលមេដឹកនាំនយោបាយ និងសកម្មជននយោបាយជាច្រើនត្រូវបានចាប់ខ្លួន ហើយប្រជាជនត្រូវបានយោធាធ្វើទារុណកម្ម»។
នៅក្នុងខែវិច្ឆិកា ឆ្នាំ ២០២០ គណបក្ស NLD បានទទួលជ័យជម្នះភ្លូកទឹកភ្លូកដីនៅក្នុងការបោះឆ្នោតសភារបស់ប្រទេស ។ ប៉ុន្តែបីខែក្រោយមក កងទ័ពបានធ្វើរដ្ឋប្រហារ និងចាប់ឃុំខ្លួនលោកស្រី អ៊ុងសាន ស៊ូជី ។
ប្រភព ៖ Al Jazeera
By Suon Visal
