ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន បានព្រមានសហរដ្ឋអាម៉េរិកថា នឹងប្រឈមមុខនឹង “វិបត្តិសន្តិសុខកាន់តែធ្ងន់ធ្ងរ” នៅពេលដែលទីក្រុងវ៉ាស៊ីនតោន ជំរុញឱ្យអង្គការសហប្រជាជាតិថ្កោលទោសចំពោះការសាកល្បងមីស៊ីលឆ្លងទ្វីបនាពេលថ្មីៗនេះរបស់កូរ៉េខាងជើង ។
ការព្រមានរបស់លោកស្រី គីម យ៉ូជុង បានកើតឡើងប៉ុន្មានម៉ោងបន្ទាប់ពីឯកអគ្គរដ្ឋទូតអាម៉េរិកលោកស្រី Linda Thomas-Greenfield បានប្រាប់កិច្ចប្រជុំបន្ទាន់នៃក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារថា សហរដ្ឋអាម៉េរិកនឹងផ្សព្វផ្សាយសេចក្តីថ្លែងការណ៍របស់ប្រធានាធិបតីដែលបានស្នើឡើងដោយថ្កោលទោសការបាញ់មីស៊ីលដែលត្រូវបានហាមឃាត់របស់កូរ៉េខាងជើង និងសកម្មភាពអស្ថិរភាពផ្សេងទៀត ។
លោកស្រី គីម យ៉ូជុង ដែលត្រូវបានគេចាត់ទុកថា ជាបុគ្គលដ៏មានឥទ្ធិពលបំផុតទីពីររបស់កូរ៉េខាងជើង បន្ទាប់ពីបងប្រុសរបស់នាង បានរិះគន់សហរដ្ឋអាម៉េរិកចំពោះការចេញនូវអ្វីដែលលោកស្រីហៅថា “សេចក្តីថ្លែងការណ៍រួមដ៏គួរឱ្យស្អប់ខ្ពើម រួមគ្នាជាមួយពួកអសុរកាយដូចជា អង់គ្លេស បារាំង អូស្ត្រាលី ជប៉ុន និងកូរ៉េខាងត្បូង” ។
លោកស្រី គីម យ៉ូជុង បានប្រៀបធៀបសហរដ្ឋអាម៉េរិកទៅនឹងឆ្កែដែលព្រុស ដោយសារតែភាពភ័យខ្លាច”។ លោកស្រីបាននិយាយថា កូរ៉េខាងជើងបានចាត់ទុកសេចក្តីថ្លែងការណ៍ដឹកនាំដោយសហរដ្ឋអាម៉េរិកថាជាការរំលោភអធិបតេយ្យភាពរបស់យើង និងជាការបង្ករឿងនយោបាយយ៉ាងធ្ងន់ធ្ងរ ។
ប្រភព ៖ South China Morning Post