អភិបាលក្នុងតំបន់បាននិយាយថា ខ្មាន់កាំភ្លើងម្នាក់ត្រូវបានឃាត់ខ្លួន បន្ទាប់ពីបានបើកការបាញ់ប្រហារនៅឯការិយាល័យចុះឈ្មោះ និងចូលបម្រើយោធារុស្ស៊ីនៅក្នុងតំបន់ Irkutsk របស់ប្រទេសរុស្ស៊ីថ្ងៃចន្ទនេះ ។ នេះបើយោងតាមការចេញផ្សាយដោយសារព័ត៌មាន Reuters ។
ខ្មាន់កាំភ្លើងដែលនៅក្នុងវីដេអូដែលបានផ្សព្វផ្សាយនៅលើប្រព័ន្ធផ្សព្វផ្សាយសង្គមត្រូវបានគេមើលឃើញថាបានកំណត់អត្តសញ្ញាណខ្លួនឯងទៅមន្រ្តីប៉ូលីសថាឈ្មោះ Ruslan Zinin អាយុ 25 ឆ្នាំបានបើកការបាញ់ប្រហារនៅឯការិយាល័យចុះឈ្មោះយោធាមួយនៅក្នុងទីក្រុង Ust-Ilimsk ។ វីដេអូដាច់ដោយឡែកនៃការបាញ់ប្រហារបង្ហាញថាគាត់បាញ់យ៉ាងហោចណាស់មួយគ្រាប់នៅខាងក្នុងការិយាល័យ ។
អភិបាលតំបន់ Irkutsk លោក Igor Kobzev បានសរសេរនៅលើកម្មវិធីផ្ញើសារ Telegram ថា ប្រធានការិយាល័យចុះឈ្មោះយោធាកំពុងស្ថិតនៅក្នុងមន្ទីរពេទ្យក្នុងស្ថានភាពធ្ងន់ធ្ងរ ហើយអ្នកបាញ់ប្រហារដែលត្រូវបានឃាត់ខ្លួន “នឹងត្រូវផ្តន្ទាទោសជាដាច់ខាត” ។
ការិយាល័យចុះឈ្មោះ និងចូលបម្រើយោធាមួយចំនួនត្រូវបានវាយប្រហារ ចាប់តាំងពីប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាសពីការកេណ្ឌទ័ពបម្រុងកាលពីថ្ងៃពុធសប្តាហ៍មុន ។