ប្រធានបញ្ជាការហ្វឹកហ្វឺនពិសេសបាននិយាយកាលពីថ្ងៃពុធ ទី ២២ ខែ កុម្ភៈ ថា គ្រូបង្ហាត់យោធាអាល្លឺម៉ង់ដែលបង្រៀនទាហានអ៊ុយក្រែនប្រហែល ១,០០០ នាក់អំពីរបៀបប្រើប្រាស់រថក្រោះលោកខាងលិច និងអាវុធផ្សេងទៀតនឹងត្រូវបានពង្រឹងដោយអ្នកឯកទេសរាប់រយនាក់មកពីប្រទេសដទៃទៀត។
ឧត្តមសេនីយ៍ឯកលោក Andreas Marlow បានប្រាប់រ៉យទ័រក្នុងបទសម្ភាសន៍មួយនៅឯទីស្នាក់ការកណ្តាលរបស់គាត់នៅទីក្រុង Strausberg ក្បែរទីក្រុងប៊ែរឡាំងថា យើងកំពុងនិយាយអំពីទាហានពី ៣០ – ៥០ នាក់មកពីប្រទេសន័រវែស និងជាច្រើនរយនាក់ទៀតមកពីប្រទេសហូឡង់ ដោយគាត់បានបន្ថែមថាគាត់មានបំណងចង់ឱ្យប្រជាជាតិដទៃចូលរួមចំណែកផងដែរ។
ខ្ញុំសង្ឃឹមថា យើងនឹងអាចបញ្ចុះបញ្ចូលដៃគូបន្ថែមទៀត ឱ្យគាំទ្រយើង ដោយកត់សម្គាល់ថា គ្រូបង្វឹកបន្ថែមដំបូងគេរំពឹងថានឹងមកដល់នៅចុងខែមីនានេះ។ គួរឱ្យដឹងផងដែរថា ទីបញ្ជាការហ្វឹកហ្វឺនពិសេសរបស់ Marlow (STC) គឺជាផ្នែកមួយនៃបេសកកម្មយោធារបស់សហភាពអឺរ៉ុបដែលបានបង្កើតឡើងក្នុងខែវិច្ឆិកា ដើម្បីបណ្តុះបណ្តាលទាហានអ៊ុយក្រែនរហូតដល់ ៣០,០០០ នាក់ក្នុងជំនាញផ្សេងៗដើម្បីជួយទីក្រុង គៀវ ប្រយុទ្ធប្រឆាំងនឹងការឈ្លានពានរបស់រុស្ស៊ី។
ប្រភព៖ CNA
BY Chanratanak
