ជប៉ុន ចិន ហ្វីលីពីន និងតៃវ៉ាន់ចេញការព្រមានអំពីរលកយក្សស៊ូណាមិ ក្រោយគ្រោះរញ្ជួយដីកម្រិតខ្លាំងបានអង្រួនកោះតៃវ៉ាន់

គ្រោះររញ្ជួយដីនៅឈូងសមុទ្រតៃវ៉ាន់ដែលមានកម្រិត 7.2 រ៉ិចទ័រ បានអង្រួនរដ្ឋធានីតៃប៉ិកាលពីព្រឹកថ្ងៃពុធ ដោយបានផ្តាច់ចរន្តអគ្គិសនីនៅតំបន់មួយចំនួននៃទីក្រុង និងបង្កឱ្យមានការព្រមានអំពីរលកយក្សស៊ូណាមិសម្រាប់កោះភាគខាងត្បូងប្រទេសជប៉ុន និងហ្វីលីពីន។

ស្ថានីយ៍ទូរទស្សន៍តៃវ៉ាន់ បានបង្ហាញវីដេអូនៃអគារបាក់រលំមួយចំនួននៅក្នុងស្រុក Hualien ភាគខាងកើត នៅជិតចំណុចកណ្តាលនៃការរញ្ជួយដី ហើយប្រព័ន្ធផ្សព្វផ្សាយបានរាយការណ៍ថា មនុស្សមួយចំនួនបានជាប់នៅក្នុងអគារ ។

យោងតាមរដ្ឋបាលអាកាសធាតុកណ្តាលរបស់តៃវ៉ាន់ គ្រោះរញ្ជួយដីនេះបានកើតឡើងនៅម៉ោង ០៧ និង ៥៨ នាទីព្រឹក (២៣៥៨ GMT) ក្នុងជម្រៅ ១៥.៥ គីឡូម៉ែត្រ (៩.៦ ម៉ាយ) ពីឆ្នេរសមុទ្រភាគខាងកើតនៃកោះតៃវ៉ាន់ ។ ប្រព័ន្ធផ្សព្វផ្សាយរដ្ឋបាននិយាយថា វាគឺជាការរញ្ជួយដីដ៏ខ្លាំងបំផុតដែលបានវាយប្រហារលើកោះនេះក្នុងរយៈពេល ២៥ ឆ្នាំមកនេះ។

ប្រទេសជប៉ុនបានចេញសេចក្តីណែនាំអំពីការជម្លៀសសម្រាប់តំបន់ឆ្នេរនៃខេត្តភាគខាងត្បូងនៃកោះអូគីណាវ៉ា។ យោងតាមទីភ្នាក់ងារឧតុនិយមជប៉ុន បានឱ្យដឹងថា រលកយក្សស៊ូណាមិដែលមានកម្ពស់រហូតដល់ ៣ ម៉ែត្រ ត្រូវបានគេរំពឹងថានឹងវាយប្រហារមកដល់តំបន់ធំ ៗ នៃឆ្នេរសមុទ្រភាគនិរតីរបស់ប្រទេសជប៉ុន នេះបើយោងតាមទីភ្នាក់ងារឧតុនិយមជប៉ុន ដែលបានដាក់កម្រិតរញ្ជួយនៅកម្រិត ៧,៥ រ៉ិចទ័រ ។

ប្រព័ន្ធផ្សព្វផ្សាយរដ្ឋចិនបាននិយាយថា នៅខេត្ត Fuzhou, Xiamen, Quanzhou និង Ningde ក្នុងខេត្ត Fujian របស់ប្រទេសចិនក៏មានអារម្មណ៍រញ្ជួយដីផងដែរ ។