យោធាកូរ៉េខាងត្បូងបាននិយាយថា កូរ៉េខាងជើងបានបាញ់មីស៊ីលផ្លោងជាច្រើនគ្រាប់ ឆ្ពោះទៅកាន់សមុទ្រនៅឆ្នេរសមុទ្រភាគខាងលិចនៃឧបទ្វីបកូរ៉េ។
ការបាញ់បង្ហោះនៅព្រឹកថ្ងៃសៅរ៍នេះ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីកូរ៉េខាងជើងបានបាញ់មីស៊ីលផ្លោងចំនួនពីរគ្រាប់ ចូលទៅក្នុងដែនទឹក ពីឆ្នេរសមុទ្រភាគខាងកើតរបស់ខ្លួន នៅក្នុងអ្វីដែលខ្លួនបានពណ៌នាថាជាការក្លែងធ្វើការវាយប្រហារនុយក្លេអ៊ែរលើគោលដៅនៅក្នុងប្រទេសកូរ៉េខាងត្បូង ។
អគ្គសេនាធិការចម្រុះរបស់កូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា ការបាញ់មីស៊ីលចុងក្រោយបំផុតឆ្ពោះទៅសមុទ្រលឿងនៅម៉ោងប្រហែល ៤ ព្រឹក ម៉ោងក្នុងស្រុកនៅថ្ងៃសៅរ៍ និងកំពុងត្រូវបានវិភាគដោយអាជ្ញាធរចារកម្មកូរ៉េខាងត្បូង និងសហរដ្ឋអាម៉េរិក ។ នាយសេនាធិការចម្រុះបាននិយាយថា យោធាកូរ៉េខាងត្បូងកំពុងតាមដានស្ថានការណ៍ នេះបើយោងតាមទីភ្នាក់ងារសារព័ត៌មានយ៉ុនហាប់របស់កូរ៉េខាងត្បូង។
ប្រទេសកូរ៉េខាងជើងបាននិយាយកាលពីថ្ងៃព្រហស្បតិ៍ថា ខ្លួនបានបាញ់មីស៊ីលផ្លោងរយៈចម្ងាយខ្លីចំនួនពីរគ្រាប់នៅក្នុងសេណារីយ៉ូនៃការវាយប្រហារនុយក្លេអ៊ែរប្រឆាំងនឹងមជ្ឈមណ្ឌលបញ្ជាការយោធា និងអាកាសយានដ្ឋាននៅក្នុងប្រទេសកូរ៉េខាងត្បូង។
ការបាញ់មីស៊ីលជាច្រើននេះជាការឆ្លើយតបទៅនឹងសមយុទ្ធយោធា Ulchi Freedom Shield រយៈពេល ១១ ថ្ងៃរវាងកងកម្លាំងកូរ៉េខាងត្បូង និងសហរដ្ឋអាម៉េរិក ជាសមយុទ្ធដែលកូរ៉េខាងជើងបានអះអាងជាយូរមកហើយថាជាការហាត់សមសម្រាប់ការលុកលុយនាពេលអនាគតដែលអាចកើតមានលើទឹកដីរបស់ខ្លួនដោយសត្រូវនៅទីក្រុងសេអ៊ូល និងវ៉ាស៊ីនតោន ។
Al Jazeera
