វិមានក្រឹមឡាំងបាននិយាយថា ការផ្គត់ផ្គង់ឧស្ម័នរបស់រុស្ស៊ីទៅកាន់អឺរ៉ុបតាមរយៈបំពង់ Nord Stream 1 នឹងមិនដំណើរការឡើងវិញពេញលេញទេ រហូតទាល់តែក្រុមប្រទេសលោកខាងលិច ដកទណ្ឌកម្មប្រឆាំងនឹងទីក្រុងម៉ូស្គូ ជុំវិញការលុកលុយរបស់ខ្លួនលើអ៊ុយក្រែន ។ នេះបើយោងតាមការចេញផ្សាយដោយសារព័ត៌មាន Financial Times ។
លោក Dmitry Peskov អ្នកនាំពាក្យរបស់ប្រធានាធិបតី វ៉្លាឌីមៀរ ពូទីន បានស្តីបន្ទោសសហភាពអឺរ៉ុប ចក្រភពអង់គ្លេស និងទណ្ឌកម្មរបស់កាណាដាចំពោះការខកខានរបស់រុស្ស៊ីក្នុងការបញ្ជូនឧស្ម័នតាមរយៈបំពង់បង្ហូរប្រេងដ៏សំខាន់ ដែលបញ្ជូនឧស្ម័នទៅកាន់ប្រទេសអាល្លឺម៉ង់ពីទីក្រុង St Petersburg តាមសមុទ្របាល់ទិក។
លោក Peskov ត្រូវបានដកស្រង់សម្តីដោយទីភ្នាក់ងារសារព័ត៌មាន Interfax ថា “បញ្ហានៃការបូមឧស្ម័នកើតឡើងដោយសារតែការដាក់ទណ្ឌកម្មប្រទេសលោកខាងលិចប្រឆាំងនឹងប្រទេសរបស់យើង និងក្រុមហ៊ុនមួយចំនួន” ។ លោកបានបន្ថែមថា “មិនមានហេតុផលផ្សេងទៀតដែលអាចបណ្តាលឱ្យមានបញ្ហាបូមនេះទេ” ។
ការអត្ថាធិប្បាយរបស់លោក Peskov គឺជាការទាមទារដ៏តឹងរ៉ឹងបំផុតដោយវិមានក្រឹមឡាំង ដែលតម្រូវឲ្យសហភាពអឺរ៉ុបដកទណ្ឌកម្មរបស់ខ្លួនជាថ្នូរនឹងការឱ្យរុស្ស៊ីបន្តការចែកចាយឧស្ម័នទៅកាន់ទ្វីបនេះ ។
រុស្សីនៅតែផ្គត់ផ្គង់ឧស្ម័នដល់អឺរ៉ុបតាមរយៈបំពង់បង្ហូរប្រេងសម័យសូវៀតឆ្លងកាត់អ៊ុយក្រែន ដែលនៅតែបើកទោះបីជាមានការលុកលុយក៏ដោយតែក្នុងចំនួនតិចតួចបំផុត។
មន្ត្រីរុស្ស៊ីមានក្ដីសង្ឃឹមថា វិបត្តិថាមពលដែលកំពុងកើតឡើងនៅអឺរ៉ុបនឹងរារាំងការគាំទ្ររបស់ប្លុកនេះសម្រាប់អ៊ុយក្រែន ។ លោក Peskov បាននិយាយថា “ជាក់ស្តែងជីវិតកាន់តែអាក្រក់ទៅៗសម្រាប់មនុស្ស អ្នកជំនួញ និងក្រុមហ៊ុននៅអឺរ៉ុប” ។ “ពិតណាស់ មនុស្សសាមញ្ញនៅក្នុងប្រទេសទាំងនេះនឹងមានសំណួរកាន់តែច្រើនឡើងៗសម្រាប់មេដឹកនាំរបស់ពួកគេ”។