អង្គការសហប្រជាជាតិបាននិយាយកាលពីថ្ងៃអង្គារ (29 សីហា) ថា នៅក្នុងតំបន់អាស៊ីអាគ្នេយ៍មនុស្សរាប់សែននាក់កំពុងត្រូវបានបង្ខិតបង្ខំ ការធ្វើទារុណកម្មដោយក្រុមឧក្រិដ្ឋជនឱ្យធ្វើសកម្មភាពបោកប្រាស់តាមអ៊ីនធឺណេត ។
UN បាននិយាយនៅក្នុងរបាយការណ៍មួយថា មនុស្សជាច្រើនត្រូវបានគេជួញដូរឱ្យធ្វើការក្នុងឧក្រិដ្ឋកម្មអនឡាញ ហើយប្រឈមមុខនឹងការរំលោភធ្ងន់ធ្ងរ ដូចជាការធ្វើទារុណកម្ម ឬអំពើហិង្សាផ្លូវភេទ ។ ប្រធានទទួលបន្ទុកសិទ្ធិមនុស្សរបស់អង្គការសហប្រជាជាតិ លោក Volker Turk បាននិយាយថា “អ្នកដែលត្រូវបានបង្ខិតបង្ខំឱ្យធ្វើការក្នុងប្រតិបត្តិការបោកប្រាស់ទាំងនេះ ស៊ូទ្រាំនឹងការប្រព្រឹត្តដោយអំពើអមនុស្សធម៌ ពីសំណាក់ក្រុមឧក្រិដ្ឋជនឱ្យប្រព្រឹត្តឧក្រិដ្ឋកម្ម” ។ “ពួកគេទាំងនោះជាជនរងគ្រោះ ។ ពួកគេមិនមែនជាឧក្រិដ្ឋជនទេ”។
របាយការណ៍នោះក៏បានកត់សម្គាល់ថា ទំហំនៃសកម្មភាពបោកប្រាស់នៅតាមតំបន់អាស៊ីអាគ្នេយ៍គឺពិបាកក្នុងការវាស់ស្ទង់ដោយសារតែលក្ខណៈនៃការលាក់កំបាំង និងចន្លោះប្រហោងក្នុងការឆ្លើយតបរបស់អាជ្ញាធរក្នុងតំបន់ ។
ទោះបីជាយ៉ាងណាក៏ដោយរបាយការណ៍បាននិយាយថា ប្រភពដែលអាចជឿទុកចិត្តបានបានបង្ហាញថាយ៉ាងហោចណាស់មនុស្ស ១២០,០០០ នៅទូទាំងប្រទេសមីយ៉ាន់ម៉ាអាចនឹងត្រូវបានបង្ខំឱ្យអនុវត្តការបោកប្រាស់តាមអ៊ីនធឺណិត ។ ខណៈនៅក្នុងប្រទេសកម្ពុជាមានចំនួនប្រហែល ១០ ម៉ឺននាក់ ។ ឡាវ ហ្វីលីពីន និងថៃ ស្ថិតក្នុងចំណោមប្រជាជាតិផ្សេងទៀតនៅក្នុងតំបន់ដែលត្រូវបានកំណត់ថាជាប្រទេសសំខាន់នៃទិសដៅឆ្លងកាត់របស់ជនរងគ្រោះ មកពីទូទាំងតំបន់អាស៊ាន ចិនដីគោក ហុងកុង តៃវ៉ាន់ អាស៊ីខាងត្បូង និងផ្សេងទៀតមកពីអាហ្វ្រិក និងអាមេរិកឡាទីន ។
UN បាននិយាយថា មជ្ឈមណ្ឌលបោកប្រាស់ទាំងនោះ បង្កើតប្រាក់ចំណូលបានរាប់ពាន់លានដុល្លារក្នុងមួយឆ្នាំ ។ របាយការណ៍បន្ថែមថា មនុស្សភាគច្រើនដែលត្រូវបានជួញដូរក្នុងប្រតិបត្តិការបោកប្រាស់តាមអ៊ីនធឺណិតគឺជាបុរស ខណៈស្ត្រី និងក្មេងជំទង់ក៏ជាជនរងគ្រោះផងដែរ ។
បណ្តាញខុសច្បាប់ទាំងនេះទទួលបានអត្ថប្រយោជន៍ពីជំងឺរាតត្បាតកូវីដ-១៩ ដោយសារមនុស្សភាគច្រើនជាប់គាំងក្នុងប្រទេស និងគ្មានការងារធ្វើ ដោយសារការបិទព្រំដែន និងការបិទអាជីវកម្ម។ ការបិទខ្ទប់បានធ្វើឲ្យមនុស្សចំណាយពេលច្រើនលើអ៊ីនធើណេត ហើយងាយនឹងក្លាយទៅជាគោលដៅនៃការបោកប្រាស់តាមអ៊ីនធើណិត ។
ប្រែសម្រួលទាំងស្រុងពី CNA
ដោយ Sok Sorphorn ,ពិនិត្យដោយ Suon Visal