ឥណ្ឌាដាក់ពង្រាយទាហានរាប់ពាន់នាក់ ដើម្បីពង្រឹងព្រំដែនដែលមានជម្លោះជាមួយចិន ដែលអាចជាការបន្ថែមការខឹងសម្បារ ខណៈទំនាក់ទំនងរវាងឥណ្ឌាជាមួយក្រុងប៉េកាំងស្ថិតក្នុងសភាពអាក្រក់រួចទៅហើយ ។
មន្ត្រីជាន់ខ្ពស់ឥណ្ឌាដែលសុំមិនបញ្ចេញឈ្មោះបាននិយាយថា ទាហានខ្លាំងៗចំនួន ១០,០០០ នាក់ ត្រូវបានចាត់ឱ្យទៅការពារព្រំដែនរបស់ខ្លួនជាមួយប្រទេសចិន ។ បន្ថែមពីលើ ទាហានចំនួន ៩,០០០ នាក់ ដែលត្រូវបានកំណត់រួចហើយទៅកាន់ព្រំដែនជាមួយចិនដែលមានជម្លោះ ។ កម្លាំងចម្រុះនឹងការពារព្រំដែនប្រវែង ៥៣២ គីឡូម៉ែត្រ ដែលបំបែកតំបន់ទីបេរបស់ប្រទេសចិនជាមួយរដ្ឋភាគខាងជើងនៃប្រទេសឥណ្ឌាគឺ Uttarakhand និង Himachal Pradesh ។
កងទ័ពឥណ្ឌា និងក្រសួងការពារជាតិបានបដិសេធមិនធ្វើអត្ថាធិប្បាយទេ។
ចំណែកចិនតាមរយៈអ្នកនាំពាក្យក្រសួងការបរទេសលោកស្រី ម៉ៅ នីងបាននិយាយកាលពីថ្ងៃសុក្រថា ប្រទេសចិនជឿជាក់ថា ការសម្រេចចិត្តរបស់ឥណ្ឌាក្នុងការបញ្ជូនកងទ័ពបន្ថែមទៀតនៅព្រំដែនជម្លោះរបស់ពួកគេគឺ មិនមានផលល្អដល់ការបន្ធូរបន្ថយភាពតានតឹងទេ ។ ប្រទេសចិនប្តេជ្ញាធ្វើការជាមួយឥណ្ឌាដើម្បីការពារសន្តិភាព និងស្ថិរភាពនៃតំបន់ព្រំដែន ។
Bloomberg
