ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បាននិយាយថា អ៊ុយក្រែនទើបតែបានបង្កើតអាវុធថ្មីដែលអាចបាញ់ដល់គោលដៅចម្ងាយ ៧០០ គីឡូម៉ែត្រ ចំពេលមានការវាយប្រហារតាមអាកាសនៅសប្តាហ៍នេះលើអាកាសយានដ្ឋានមួយនៅភាគខាងលិចប្រទេសរុស្ស៊ីដែលបានបំផ្លាញយន្តហោះយោធាជាច្រើន ។ អាវុធនេះផលិតដោយក្រសួងឧស្សាហកម្មយុទ្ធសាស្ត្ររបស់អ៊ុយក្រែន ប៉ុន្តែលោកមិនបានផ្តល់ព័ត៌មានលម្អិតបន្ថែមទេ។
ការអះអាងរបស់លោក ហ្សេលេនស្គី លើអាវុធរយៈចម្ងាយឆ្ងាយថ្មីរបស់អ៊ុយក្រែន បានកើតឡើងមុនពេលមន្ត្រីរុស្ស៊ីរាយការណ៍នៅព្រឹកថ្ងៃសុក្រថា អង្គភាពការពារដែនអាកាសបានបាញ់ទម្លាក់វត្ថុមិនស្គាល់អត្តសញ្ញាណនៅក្នុងតំបន់ Pskov ភាគខាងលិចរបស់រុស្ស៊ី ដែលជាតំបន់ដូចគ្នាដែលការវាយប្រហារតាមអាកាសរបស់អ៊ុយក្រែនត្រូវបានគេរាយការណ៍ថាបានធ្វើឱ្យខូចខាតយន្តហោះដឹកជញ្ជូនយោធា Il-76 ចំនួន៤គ្រឿងកាលពីថ្ងៃពុធ ។
ខណៈពេលដែលអ៊ុយក្រែនកម្រធ្វើអត្ថាធិប្បាយដោយផ្ទាល់លើការវាយប្រហារជាក់លាក់នៅក្នុងប្រទេសរុស្ស៊ី លោក ហ្សេលេនស្គី ហាក់ដូចជាបានចង្អុលបង្ហាញពីរដងកាលពីថ្ងៃព្រហស្បតិ៍ថា កងកម្លាំងអ៊ុយក្រែននៅពីក្រោយការវាយប្រហារអាកាសយានដ្ឋាន Pskov ។ ព្រលានយន្តហោះដែលរងការវាយប្រហារក្នុងតំបន់ Pskov របស់រុស្ស៊ី ស្ថិតនៅចម្ងាយប្រមាណ ៧០០ គីឡូម៉ែត្រភាគខាងជើងព្រំដែនអ៊ុយក្រែន។
Al Jazeera
