មន្ត្រីសេតវិមានកំពូលមួយរូបបាននិយាយថា កូរ៉េខាងជើងនឹងបង់ថ្លៃខូចខាត ប្រសិនបើខ្លួនព្រមលក់អាវុធឱ្យរុស្ស៊ីសម្រាប់សង្គ្រាមនៅអ៊ុយក្រែន បន្ទាប់ពីក្រុងវ៉ាស៊ីនតោនបានព្រមានថា ទីក្រុងព្យុងយ៉ាងកំពុងពិភាក្សាជាមួយទីក្រុងម៉ូស្គូអំពីកិច្ចព្រមព្រៀងអាវុធដ៏មានសក្តានុពលមួយ។
ទីប្រឹក្សាសន្តិសុខជាតិអាម៉េរិក លោក Jake Sullivan បាននិយាយកាលពីថ្ងៃអង្គារថា សហរដ្ឋអាម៉េរិកជឿថា ការចរចារវាងកូរ៉េខាងជើង និងរុស្ស៊ីកំពុងរីកចម្រើនយ៉ាងសកម្ម ។ «ការផ្តល់អាវុធដល់រុស្ស៊ីសម្រាប់ប្រើប្រាស់ក្នុងសមរភូមិប្រយុទ្ធដើម្បីវាយប្រហារលើឃ្លាំងស្តុកគ្រាប់ធញ្ញជាតិ និងហេដ្ឋារចនាសម្ព័ន្ធថាមពលនៃទីក្រុងធំៗនៅពេលយើងឈានចូលរដូវរងា ដើម្បីព្យាយាមដណ្តើមយកទឹកដីដែលជាកម្មសិទ្ធិរបស់ប្រទេសអធិបតេយ្យភាពទំនើប នេះនឹងមិនឆ្លុះបញ្ចាំងឱ្យឃើញច្បាស់ពីផលល្អដល់កូរ៉េខាងជើងនោះទេហើយពួកគេនឹងបង់ថ្លៃសម្រាប់រឿងនេះនៅក្នុងសហគមន៍អន្តរជាតិ” ។
ការអត្ថាធិប្បាយរបស់គាត់កើតឡើងបន្ទាប់ពីមន្ត្រីម្នាក់ទៀតនៅក្នុងរដ្ឋបាលរបស់ប្រធានាធិបតីអាម៉េរិក ចូ បៃដិន បាននិយាយកាលពីថ្ងៃចន្ទថា ទីក្រុងវ៉ាស៊ីនតោនរំពឹងថាមេដឹកនាំកូរ៉េខាងជើងលោក គីម ជុងអ៊ុន នឹងជួបជាមួយប្រធានាធិបតីរុស្ស៊ីលោក វ៉្លាឌីមៀរ ពូទីន ។
វិមានក្រឹមឡាំងបានបដិសេធមិនធ្វើអត្ថាធិប្បាយលើការអះអាងរបស់សហរដ្ឋអាម៉េរិកដោយសង្កត់ធ្ងន់ថាខ្លួនមិនមានអ្វីត្រូវនិយាយអំពីរបាយការណ៍នៃកិច្ចពិភាក្សាផ្ទាល់ដែលមានសក្តានុពលរវាងមេដឹកនាំទាំងពីរនោះទេ ។
Al Jazeera
