ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយនៅក្នុងបទសម្ភាសន៍មួយជាមួយទូរទស្សន៍រដ្ឋរុស្ស៊ីនៅថ្ងៃអាទិត្យនេះថា រុស្ស៊ី និងចិនមិនបង្កើតសម្ព័ន្ធភាពយោធាទេ ហើយក៏មិនបានលាក់បាំងអ្វីទាំងអស់ទាក់ទងនឹងកិច្ចសហប្រតិបត្តិការយោធារបស់ពួកគេ ។
លោក ពូទីន និងប្រធានាធិបតីចិន លោក ស៊ី ជីនពីង បានប្រកាសអំពីមិត្តភាព និងបានសន្យាទំនាក់ទំនងកាន់តែជិតស្និទ្ធនៅក្នុងកិច្ចប្រជុំកំពូលនៅទីក្រុងម៉ូស្គូកាលពីដើមសប្តាហ៍នេះ ខណៈដែលរុស្ស៊ីព្យាយាមរកផលចំណេញនៅក្នុងអ្វីដែលខ្លួនហៅថា “ប្រតិបត្តិការយោធាពិសេស” នៅអ៊ុយក្រែន ។
សារព័ត៌មាន Interfax បានដកស្រង់សម្តីលោកពូទីនថា “យើងមិនបង្កើតសម្ពន្ធភាពយោធាជាមួយចិនទេ” ។ “បាទ យើងមានកិច្ចសហប្រតិបត្តិការក្នុងវិស័យនៃអន្តរកម្មបច្ចេកទេសយោធា ។ យើងមិនលាក់បាំងរឿងនេះទេ។ «អ្វីៗមានតម្លាភាព គ្មានអ្វីជាអាថ៌កំបាំងឡើយ»។
លោក ពូទីន ក៏បាននិយាយផងដែរថា មហាអំណាចលោកខាងលិចកំពុងព្យាយាមបង្កើតសម្ពន្ធភាពជាសាកលបន្ថែមទៀត ដោយចោទប្រកាន់សហរដ្ឋអាម៉េរិក និងអង្គការសន្ធិសញ្ញាអាត្លង់ទិកខាងជើង (NATO) ថាបានចាប់ផ្តើមបង្កើត “អ័ក្ស” ថ្មីមួយ ដែលមានលក្ខណៈស្រដៀងទៅនឹងសម្ពន្ធមិត្តត្រីភាគីរបស់អាល្លឺម៉ង់ អ៊ីតាលី និងជប៉ុន ក្នុងសង្រ្គាមលោកលើកទី២ ។
លោកពូទីនបាននិយាយថា “នោះហើយជាមូលហេតុដែលអ្នកវិភាគលោកខាងលិច … កំពុងនិយាយអំពីលោកខាងលិចចាប់ផ្តើមបង្កើតអ័ក្សថ្មីមួយដែលស្រដៀងនឹងការបង្កើតឡើងក្នុងទសវត្សរ៍ឆ្នាំ 1930 ដោយរបបហ្វាស៊ីសអាល្លឺម៉ង់ និងអ៊ីតាលី និងជប៉ុននិយម” ។
ប្រភព ៖ Reuters
By Suon Visal
