ប្រធានាធិបតីអាម៉េរិកលោកចូ បៃដិនកាលពីថ្ងៃព្រហស្បតិ៍បានលើកឡើងការប្ដេជ្ញាចិត្តរបស់អាម៉េរិកទៅកាន់មេដឹកនាំប្រទេស និងនាយកប្រតិបត្តិដែលចូលរួមក្នុងកិច្ចប្រជុំកំពូលអាស៊ីប៉ាស៊ីហ្វិកថា សហរដ្ឋអាម៉េរិកប្តេជ្ញាចំពោះស្តង់ដារខ្ពស់ក្នុងពាណិជ្ជកម្ម និងចំពោះភាពជាដៃគូដែលនឹងផ្តល់ផលប្រយោជន៍ដល់សេដ្ឋកិច្ចនៅទូទាំងតំបន់ប៉ាស៊ីហ្វិក ។ គាត់បានប្រកាសថា “អាម៉េរិកមិនទៅណាទេ” ។
ថ្លែងពីជំនួបជាមួយប្រធានាធិបតីចិន លោក ស៊ី ជីនពីង លោក បៃដិន ក៏បានប្រាប់មេដឹកនាំធុរកិច្ចថា សហរដ្ឋអាម៉េរិកកំពុងកាត់បន្ថយហានិភ័យ និងការធ្វើពិពិធកម្មឲ្យកាន់តែសម្បូរបែបបន្ថែម ប៉ុន្តែមិនមែនបែកចេញពីទីក្រុងប៉េកាំងនោះទេ ។ ប៉ុន្តែលោកក៏បានផ្តល់យោបល់ថា សហរដ្ឋអាម៉េរិក និងសម្ពន្ធមិត្តក្នុងតំបន់ប៉ាស៊ីហ្វិកអាចផ្តល់ឲ្យអាជីវកម្មនូវជម្រើសល្អជាងប្រទេសចិន ។ លោកក៏បានកត់សម្គាល់ផងដែរថា សេដ្ឋកិច្ចរបស់សហរដ្ឋអាម៉េរិកបានវិនិយោគប្រមាណ ៥០ ពាន់លានដុល្លារក្នុងកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកក្នុងឆ្នាំ 2023 រួមទាំងក្នុងវិស័យបច្ចេកវិទ្យាថាមពលស្អាត អាកាសចរណ៍ និងសន្តិសុខតាមអ៊ីនធឺណិត។
លោក បៃដិន ក៏បានផ្ញើសារច្បាស់លាស់មួយអំពីភាពជាអ្នកដឹកនាំពិភពលោករបស់អាម៉េរិក នៅពេលដែលមេដឹកនាំអាជីវកម្មប្រឈមមុខនឹងហានិភ័យនៃការធ្វើអាជីវកម្មនៅចំពោះមុខសង្រ្គាមនៅមជ្ឈិមបូព៌ា និងអឺរ៉ុប និងសេដ្ឋកិច្ចដែលនៅតែរង្គោះរង្គើក្រោយជំងឺរាតត្បាត ។ លោកក៏បានចំណាយពេលកាលពីថ្ងៃព្រហស្បតិ៍ ដើម្បីឲ្យមេដឹកនាំឥណ្ឌូប៉ាស៊ីហ្វិកដឹងថា សហរដ្ឋអាម៉េរិកប្តេជ្ញាចិត្តក្នុងការពង្រឹងទំនាក់ទំនងសេដ្ឋកិច្ចនៅទូទាំងតំបន់។
នៅក្នុងសុន្ទរកថារបស់លោក បៃដិនទៅកាន់នាយកប្រតិបត្តិនានាលោកបានព្យាយាមបង្ហាញពីកិច្ចខិតខំប្រឹងប្រែងរបស់រដ្ឋបាលរបស់គាត់ក្នុងការពង្រឹងទំនាក់ទំនងជាមួយតំបន់ ។ សមាជិក APEC បានបណ្តាក់ទុនចំនួន ១,៧ពាន់ពាន់លានដុល្លារនៅក្នុងសេដ្ឋកិច្ចអាម៉េរិក ដោយបានជួយបង្កើតការងារដល់ប្រជាជនអាម៉េរិកចំនួន ២,៣លានកន្លែង ។ ក្រុមហ៊ុនអាម៉េរិកបានវិនិយោគប្រហែល ១,៤ ពាន់ពាន់លានដុល្លារនៅក្នុងសេដ្ឋកិច្ចរបស់សមាជិក APEC ។
