យោងតាមមន្ត្រីក្នុងតំបន់បានឱ្យដឹងថា មនុស្សជាង ២០ នាក់បានរងរបួសនៅក្នុងការវាយប្រហារដោយមីស៊ីលរបស់រុស្ស៊ីទៅលើតំបន់យ៉ាងហោចណាស់ចំនួន ៨ ក្នុងប្រទេសអ៊ុយក្រែន ហើយមនុស្ស ២ នាក់ត្រូវបានសម្លាប់នៅក្នុងការបាញ់ផ្លោងដាក់អគារលំនៅដ្ឋានមួយនៅក្នុងទីក្រុង Kherson ។
អគ្គសេនាធិការរបស់អ៊ុយក្រែនបាននិយាយនៅព្រឹកថ្ងៃព្រហស្បតិ៍ថា ចាប់តាំងពីព្រឹកព្រលឹមមករុស្ស៊ីបានបើកការវាយប្រហារដោយមីស៊ីលដ៏ធំមួយទៅលើហេដ្ឋារចនាសម្ពន្ធស៊ីវិលនៃតំបន់មួយចំនួន” ។ អគ្គមេបញ្ជាការនៃកងកម្លាំងប្រដាប់អាវុធអ៊ុយក្រែនលោក Valery Zaluzhny បាននិយាយថា មីស៊ីលចំនួន ៣៦ ក្នុងចំណោម ៤៣ គ្រាប់របស់រុស្ស៊ីដែលបានបាញ់បង្ហោះពេញមួយយប់ត្រូវបានស្ទាក់ចាប់ និងបំផ្លាញដោយប្រព័ន្ធការពារដែនអាកាសរបស់អ៊ុយក្រែន ។
អភិបាលក្រុងគៀវលោក Vitalii Klitschko បាននិយាយថា មនុស្សប្រាំពីរនាក់ត្រូវបានរាយការណ៍ថាបានរងរបួសនៅក្នុងរដ្ឋធានីគៀវរួមទាំងក្មេងស្រីអាយុប្រាំបួនឆ្នាំម្នាក់ ។ អគារពាណិជ្ជកម្ម និងលំនៅឋានមួយចំនួនបានរងការខូចខាតផងដែរ ។
លោក Sergiy Popko ប្រធានរដ្ឋបាលយោធារបស់ទីក្រុងគៀវបាននិយាយថា រុស្ស៊ីបានបាញ់បង្ហោះមីស៊ីលច្រើនជាង ២០ គ្រាប់សំដៅទីក្រុងគៀវ តែអ៊ុយក្រែនបានបាញ់ទម្លាក់ទាំងអស់ ។ ក្រុមមន្ត្រី និងប្រព័ន្ធផ្សព្វផ្សាយក្នុងស្រុកក៏បានរាយការណ៍ពីការវាយប្រហារនៅក្នុងតំបន់ Cherkasy, Kharkiv, Khmelnytskiy, Rivne, Vinnytsia, Lviv និងតំបន់ Ivano-Frankivsk របស់ប្រទេសអ៊ុយក្រែន ។
អភិបាលតំបន់ លោក Oleksandr Prokudin បាននិយាយថា នៅទីក្រុង Kherson ភាគខាងត្បូង មនុស្សពីរនាក់បានស្លាប់ និងប្រាំនាក់ទៀតរងរបួស ដោយការបាញ់ផ្លោងកាំភ្លើងធំរបស់រុស្ស៊ី ដែលបានវាយប្រហារអគារលំនៅដ្ឋានមួយកន្លែង។
Al Jazeera
