ក្រសួងមហាផ្ទៃអ៊ុយក្រែណបាននិយាយនៅថ្ងៃសៅរ៍នេះថា មនុស្ស ៧ នាក់រួមទាំងកុមារអាយុ ៦ ឆ្នាំម្នាក់ត្រូវបានសម្លាប់ និង ៩០ នាក់បានរងរបួស នៅពេលដែលមីស៊ីលរុស្ស៊ីបានវាយប្រហារលើទីលានកណ្តាលក្នុងទីក្រុង Chernihiv ភាគខាងជើងនៃប្រទេសអ៊ុយក្រែន ។
ក្រសួងបាននិយាយថា ប្រជាជនបានធ្វើដំណើរទៅកាន់ព្រះវិហារដើម្បីប្រារព្ធពិធីបុណ្យសាសនា នៅពេលដែលការវាយប្រហារបានកើតឡើង ដោយបន្ថែមថាអ្នករបួស ១២ នាក់ជាកុមារ និង ១០ នាក់ជាមន្ត្រីប៉ូលិស ។
ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី ដែលកំពុងបំពេញទស្សនកិច្ចការងារនៅប្រទេសស៊ុយអែត បានបង្ហោះនៅលើ Telegram ថា មីស៊ីលរុស្ស៊ីមួយបានវាយប្រហារចំកណ្តាលទីក្រុង Chernihiv រួមទាំងរោងមហោស្រព និងសាកលវិទ្យាល័យមួយ ។
វីដេអូខ្លីដែលបញ្ចេញដោយលោក ហ្សេលេនស្គី បានបង្ហាញពីកំទេចកំទីដែលរាយប៉ាយនៅពីមុខរោងកុនក្នុងតំបន់ ជាកន្លែងដែលរថយន្តជាច្រើនបានរងការខូចខាតយ៉ាងដំណំ ។ វីដេអូនេះក៏បានបង្ហាញយ៉ាងខ្លីផងដែរ នូវសាកសពមួយបានដេកនៅក្នុងរថយន្ត ។ ក្រសួងមហាផ្ទៃបាននិយាយថា ដំបូលរោងល្ខោនត្រូវបានបំផ្លាញក្នុងការវាយប្រហារនេះផងដែរ ។
កងទ័ពអាកាសរបស់ទីក្រុងគៀវបាននិយាយនៅព្រឹកថ្ងៃសៅរ៍នេះថា យោធាអ៊ុយក្រែនបានបាញ់ទម្លាក់យន្តហោះគ្មានមនុស្សបើក Shahed ដែលផលិតដោយអ៊ីរ៉ង់ ១៥ គ្រឿងក្នុងចំណោម ១៧ គ្រឿងនៅក្នុងការវាយប្រហារពេញមួយយប់ ។
Reuters
