ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានអំពាវនាវឱ្យសហរដ្ឋអាម៉េរិកផ្តល់ជំនួយបន្ថែមទៀតដើម្បីជួយកងកម្លាំងអ៊ុយក្រែនប្រឆាំងនឹងរុស្ស៊ី និងបានអញ្ជើញអតីតប្រធានាធិបតីសហរដ្ឋអាម៉េរិក Donald Trump ឱ្យហោះមកមើលពីទំហំនៃជម្លោះ ។
លោក ហ្សេលេនស្គី បាននិយាយថា ទាហានអាម៉េរិកនៅទីបំផុតអាចត្រូវបានទាញចូលទៅកាន់ជិតក្នុងជម្លោះនៅអឺរ៉ុបជាមួយរុស្ស៊ី ប្រសិនបើក្រុងវ៉ាស៊ីនតោនមិនបង្កើនការគាំទ្រ។ “ប្រសិនបើរុស្ស៊ីនឹងសម្លាប់ពួកយើងទាំងអស់គ្នា ពួកគេនឹងវាយប្រហារប្រទេសណាតូ ហើយអ្នកនឹងបញ្ជូនកូនប្រុសស្រីរបស់អ្នក ទៅប្រយុទ្ធ” នេះបើយោងតាមបទសម្ភាសន៍របស់លោកជាមួយកម្មវិធី ‘Meet the Press’ របស់ទូរទស្សន៍ NBC កាលពីថ្ងៃអាទិត្យ ។
ប្រធានាធិបតីសហរដ្ឋអាម៉េរិក ចូ បៃដិន បានជំរុញសភាអាម៉េរិកឱ្យអនុម័តកញ្ចប់ចំណាយបន្ថែមចំនួន ១០៦ ពាន់លានដុល្លារ ដោយប្រាក់ភាគច្រើនជាជំនួយសម្រាប់អ៊ុយក្រែន និងប្រាក់ដែលនៅសល់នឹងត្រូវផ្ដល់ឲ្យអ៊ីស្រាអែល ឥណ្ឌូប៉ាស៊ីហ្វិក និងការអនុវត្តការពារព្រំដែន ។
លោក ត្រាំ ដែលកំពុងស្វែងរកការឈរឈ្មោះបោះឆ្នោតឡើងវិញនៅឆ្នាំ ២០២៤ និងជាបេក្ខជននាំមុខគេសម្រាប់ការតែងតាំងជាប្រធានាធិបតីរបស់គណបក្សរបស់គាត់បានរិះគន់យ៉ាងខ្លាំងចំពោះការគាំទ្ររបស់សហរដ្ឋអាម៉េរិកចំពោះទីក្រុងគៀវហើយបាននិយាយថាគាត់អាចបញ្ចប់សង្រ្គាមក្នុងរយៈពេល ២៤ ម៉ោង ប្រសិនបើជាប់ឆ្នោតឡើងវិញ ។
ឆ្លើយតបនឹងលោក ត្រាំលោក ហ្សេលេនស្គី បាននិយាយថា “ប្រសិនបើគាត់អាចមកទីនេះ ខ្ញុំនឹងត្រូវការពេល២៤ នាទីដើម្បីពន្យល់ដល់ប្រធានាធិបតី Trump ថាគាត់មិនអាចគ្រប់គ្រងសង្រ្គាមនេះបានទេ” ។ លោកមិនអាចនាំមកនូវសន្តិភាពបានដោយសារលោក ពូទីន។
Reuters
