បេឡារុស្ស ដែលជាសម្ព័ន្ធមិត្តជិតស្និទ្ធបំផុតរបស់រុស្ស៊ី បានកោះហៅអ្នកការទូតប៉ូឡូញ ដើម្បីតវ៉ានឹងអ្វីដែលខ្លួនបាននិយាយថា ឧទ្ធម្ភាគចក្រយោធាប៉ូឡូញបំពានព្រំដែនរបស់ខ្លួនកាលពីថ្ងៃសុក្រ ប៉ុន្តែមន្ត្រីយោធានៅទីក្រុងវ៉ារស្សាវីបានបដិសេធថា គ្មានការលុកលុយណាមួយបានកើតឡើងទេ។
គណៈកម្មាធិការព្រំដែនរដ្ឋបេឡារុស្សបាននិយាយថា ឧទ្ធម្ភាគចក្រយោធា Mi-24 របស់ប៉ូឡូញបានឆ្លងកាត់ព្រំដែននៅរយៈកម្ពស់ទាបបំផុត បានហោះទៅជម្រៅរហូតដល់ ១,២០០ ម៉ែត្រចូលទៅក្នុងទឹកដីនៃប្រទេសបេឡារុស្ស ហើយបន្ទាប់មកបានត្រលប់ចូលទឹកដីប៉ូឡូញវិញ” ។
ក្រសួងការបរទេសរបស់ប្រទេសបេឡារុស្ស នៅក្នុងសេចក្តីថ្លែងការណ៍មួយដែលត្រូវបានដកស្រង់ដោយទីភ្នាក់ងារព័ត៌មានផ្លូវការ BelTA បាននិយាយថា ខ្លួនបានកោះហៅភាគីប៉ូឡូញ និងទាមទារឱ្យមានការស៊ើបអង្កេត។ សេចក្តីថ្លែងការណ៍របស់ក្រសួងបាននិយាយថា “ការពន្យល់សមស្របត្រូវបានទាមទារពីភាគីប៉ូឡូញ និងការស៊ើបអង្កេតឱ្យបានហ្មត់ចត់ចំពោះឧប្បត្តិហេតុនេះ” ។
នៅទីក្រុងវ៉ារស្សាវី លោកវរសេនីយ៍ឯក Jacek Goryszewski អ្នកនាំពាក្យបញ្ជាការប្រតិបត្តិការយោធាប៉ូឡូញ បានបដិសេធទាំងស្រុងនូវការចោទប្រកាន់របស់បេឡារុស្ស ។
Reuters
