ចិនបានបញ្ចេញរូបភាពបែប Panoramic ដែលបង្ហាញពីរចនាសម្ព័ន្ធពេញលេញនៃស្ថានីយអវកាស Tiangong របស់ខ្លួនជាលើកដំបូង ។ រូបថតដែលថតដោយអ្នកអវកាសយានិកក្នុងបេសកកម្ម Shenzhou 16 ពីខាងលើស្ថានីយអវកាស Tiangong មុនពេលយានអវកាសត្រឡប់មកផែនដីវិញកាលពីខែមុន គឺជាពេលវេលាជាប្រវត្តិសាស្ត្រនៅក្នុងកម្មវិធីអវកាសរយៈពេលបីទសវត្សរ៍របស់ប្រទេសនេះ ។
រូបភាពនេះបង្ហាញស្ថានីយរាងអក្សរ T ទម្ងន់ ៩០ តោន ភ្ជាប់ជាមួយបន្ទះសូឡាដ៏ធំសម្បើម និងដៃយន្តសំខាន់ៗ រួមជាមួយនឹងព័ត៌មានលម្អិតផ្សេងទៀត និងទិដ្ឋភាពដ៏អស្ចារ្យនៃផែនដីនៅផ្ទៃខាងក្រោយ ។
រូបភាពនៃ Tiangong ជាគម្រោងដែលបានចាប់ផ្តើមនៅក្នុងឆ្នាំ ១៩៩២និងត្រូវបានបញ្ចប់ការសាងសង់កាលពីឆ្នាំមុន ត្រូវបានចេញផ្សាយកាលពីថ្ងៃអង្គារក្នុងទីក្រុងហុងកុងដោយគណៈប្រតិភូមកទស្សនាពីទីភ្នាក់ងារអវកាសចិន ។
ទីភ្នាក់ងារអវកាសចិនបាននិយាយថា មានឱកាសតិចតួចសម្រាប់អវកាសយានិកចិនក្នុងការចាប់យករូបភាពពេញលេញនៃស្ថានីយអវកាស Tiangong ។
ប៉ុន្តែនៅថ្ងៃទី ៣០ ខែតុលា បន្ទាប់ពីការផ្ដាច់ចេញពីស្ថានីយអវកាស Tiangong យានអវកាស Shenzhou 16 បានធ្វើដំណើរពិសេសឆ្លងកាត់ពីលើស្ថានីយអវកាស ដើម្បីឲ្យនាវិកថតរូបពីចម្ងាយពីរទៅបីរយម៉ែត្រ ។ រូបថតដែលបានចេញផ្សាយកាលពីថ្ងៃអង្គារត្រូវបានថតដោយលោក Gui Haichao ដែលជាអ្នកស្រាវជ្រាវជនជាតិចិនដំបូងគេ និងជាអវកាសយានិកស៊ីវិលដែលបានចូលទៅក្នុងលំហ ។
ពួកគេបង្ហាញពីភាពស៊ីសង្វាក់គ្នានៃស្ថានីយអវកាស ជាមួយនឹងម៉ូឌុលស្នូល Tianhe នៅចំកណ្តាល និងម៉ូឌុលមន្ទីរពិសោធន៍ពីរគឺ Mengtian និង Wentian នៅសងខាង ដែលនីមួយៗមានបន្ទះស្រូបពន្លឺព្រះអាទិត្យមួយគូដែលមានប្រវែង ៥៥ ម៉ែត្រ ។ រូបភាពក៏បង្ហាញពីយានអវកាស Shenzhou 17 និងយានដឹកទំនិញ Tianzhou 6 បានចូលចតនៅផ្នែកខាងមុខ និងខាងក្រោយនៃម៉ូឌុល Tianhe ។
បច្ចុប្បន្ននេះស្ថានីយអវកាស Tiangong កំពុងស្ថិតក្នុងដំណាក់កាលអភិវឌ្ឍន៍ ដែលរំពឹងថានឹងបន្តយ៉ាងហោចណាស់ ១០ ឆ្នាំ។ ទន្ទឹមនឹងនេះ ប្រតិបត្តិការរបស់ស្ថានីយអវកាសអន្តរជាតិត្រូវបានបន្តរហូតដល់ឆ្នាំ ២០៣០ មុននឹងចូលនិវត្តន៍។ Nasa បាននិយាយថា ខ្លួននឹងអាចចំណាយអស់ ១ ពាន់លានដុល្លារអាមេរិក ដើម្បីកម្ទេចស្ថានីយអវកាសអន្តរជាតិ ។
South China Morning Post
