ឧត្តមសេនីយ៍ Mark Milley បានប្រាប់ BBC ថា ប្រទេសចិនកំពុងអភិវឌ្ឍយ៉ាងខ្លាំងនូវសមត្ថភាពវាយប្រហារនៅចំណុចណាមួយ ប៉ុន្តែការសម្រេចចិត្តធ្វើដូច្នេះនឹងក្លាយជាជម្រើសនយោបាយ។
ចិននិយាយថា តៃវ៉ាន់ជាខេត្តរបស់ចិនដែលត្រូវបង្រួបបង្រួមជាថ្មីជាមួយនឹងដីគោកដោយកម្លាំងបើចាំបាច់។
ប្រទេសចិនបានចោទប្រកាន់សហរដ្ឋអាម៉េរិកថាបានគាំទ្រឯករាជ្យភាពរបស់កោះតៃវ៉ាន់ ហើយបានប្តេជ្ញាថានឹង “ប្រឆាំងយ៉ាងម៉ឺងម៉ាត់” រាល់ការប៉ុនប៉ងបែបនេះ។ ការគំរាមកំហែងគ្នាបានកើនឡើងគួរឱ្យកត់សម្គាល់នាពេលថ្មីៗនេះរវាងចិន និងសហរដ្ឋអាម៉េរិក ដែលជាសម្ព័ន្ធមិត្តដ៏មានឥទ្ធិពលបំផុតរបស់តៃវ៉ាន់ ។
ប្រទេសចិនបាននឹងកំពុងបញ្ជូនយន្តហោះចម្បាំងជាច្រើនគ្រឿងចូលទៅក្នុងតំបន់ការពារដែនអាកាសរបស់តៃវ៉ាន់ ខណៈដែលសហរដ្ឋអាម៉េរិកបានបញ្ជូននាវាកងទ័ពជើងទឹកឆ្លងកាត់ដែនទឹករបស់តៃវ៉ាន់ ។
កាលពីខែឧសភា ប្រធានាធិបតីអាម៉េរិក ចូ បៃដិន បាននិយាយថា ប្រទេសចិនកំពុងតែ “ប្រឡែងលេងនឹងគ្រោះថ្នាក់” ដោយសារយន្តហោះចម្បាំងរបស់ខ្លួនបានហោះទៅជិតកោះតៃវ៉ាន់ ។ លោក បៃដិន បានប្តេជ្ញាការពារកោះនេះដោយយោធា ប្រសិនបើកោះនេះត្រូវបានរងការវាយប្រហារ។
ទីក្រុងប៉េកាំងបានតបតវិញដោយចោទប្រកាន់សហរដ្ឋអាម៉េរិកថាបានរំលោភលើការសន្យារបស់ខ្លួនលើតៃវ៉ាន់ និង “ជ្រៀតជ្រែក” ក្នុងកិច្ចការផ្ទៃក្នុងរបស់ប្រទេសចិន ដោយបន្ថែមថាប្រទេសនេះ “នឹងមិនស្ទាក់ស្ទើរក្នុងការប្រយុទ្ធ” ដើម្បីការពារតៃវ៉ាន់ពីការប្រកាសឯករាជ្យជាផ្លូវការទេ ។
ប្រភព ៖ BBC