អ្នកជំនួញបានចង្អុលបង្ហាញថា អ្នកវិនិយោគធំៗនៅជុំវិញពិភពលោកសម្រុកវិនិយោគក្នុងទីផ្សារភាគហ៊ុនអាស៊ាន ខណៈពេលដែលទីផ្សារភាគហ៊ុនពិភពលោកមានការប្រែប្រួលខ្លាំង ។ នេះបើយោងតាមការចេញផ្សាយដោយសារព័ត៌មាន Bloomberg ។
ស្ថាប័នហិរញ្ញវត្ថុឈានមុខគេនានាលើពិភពលោកបានឱ្យដឹងថា ខណៈពេលដែលទីផ្សារភាគហ៊ុនជុំវិញពិភពលោកប្រឈមនឹងការប្រែប្រួលខ្លាំង បន្ទាប់ពីធនាគារកណ្តាលសហរដ្ឋអាម៉េរិក (Fed) បានធ្វើការដំឡើងអត្រាការប្រាក់រួចមក វិនិយោគិនបរទេសកំពុងងាកមកចាប់អារម្មណ៍ទីផ្សារភាគហ៊ុននៅអាស៊ីកាន់តែខ្លាំងឡើងៗ ជាពិសេសគឺតំបន់អាស៊ាន ។
អ្នកវិភាគមើលឃើញថា ទន្ទឹមនឹងធនាគារកណ្តាលក្នុងប្រទេសជាច្រើននៅជុំវិញពិភពលោកត្រូវបានបង្ខំឱ្យអនុវត្តគោលនយោបាយតឹងរ៉ឹងជាងមុន ដើម្បីទប់ស្កាត់អតិផរណា ដែលមួយផ្នែកធ្វើឡើងដើម្បីជំរុញសេដ្ឋកិច្ចរបស់ពួកគេក្នុងអំឡុងពេលនៃជំងឺរាតត្បាតកូវី-19 អស់រយៈជាច្រើនឆ្នាំកន្លងមកនេះ ។ យ៉ាងណាមិញបញ្ហានេះហាក់មិនសូវមានភាពធ្ងន់ធ្ងរទេនៅតំបន់អាស៊ីអាគ្នេយ៍ ។ ទីផ្សារភាគហ៊ុនក្នុងប្រទេសឥណ្ឌូណេស៊ី គឺជាទីផ្សារមួយក្នុងចំណោមទីផ្សារដែលដំណើរការបានល្អបំផុតនៅក្នុងពិភពលោកសម្រាប់ឆ្នាំនេះ ។
