អ៊ុយក្រែនបានធ្វើការវាយប្រហារដោយមីស៊ីលនៅថៃ្ងសុក្រនេះលើទីស្នាក់ការនៃកងនាវាសមុទ្រខ្មៅរបស់រុស្ស៊ីនៅកំពង់ផែ Sevastopol ក្នុងឧបទ្វីបគ្រីមៀរ ហើយរូបភាពនៅលើប្រព័ន្ធផ្សព្វផ្សាយសង្គមបានបង្ហាញពីផ្សែងហុយ ។
អភិបាលក្រុង Sevastopol ដែលដំឡើងដោយរុស្ស៊ី លោក Mikhail Razvozhayev មិនបានផ្តល់ព័ត៌មានលម្អិតណាមួយឡើយ ដោយគ្រាន់តែនិយាយថា សេវាសង្គ្រោះបន្ទាន់ត្រូវបានបញ្ជូនទៅកាន់កន្លែងដែលរងការវាយប្រហារ ហើយមិនមានព័ត៌មានអំពីអ្នកស្លាប់ និងរបួសនោះទេ ។ អភិបាលក្រុងបានព្រមានអ្នកស្រុក Sevastopol ថា “ការវាយប្រហារមួយទៀតអាចនឹងកើតមាន” ហើយបានជំរុញឱ្យពួកគេកុំឱ្យចាកចេញពីអគារហើយកុំឱ្យមកកណ្តាលទីក្រុង ។
អ៊ុយក្រែនមិនបានប្រកាសទទួលខុសត្រូវភ្លាមៗចំពោះការវាយប្រហារនោះទេ។
សារព័ត៌មានរុស្ស៊ីបានរាយការណ៍ថា អ្នកស្រុក Sevastopol បានឮការផ្ទុះនៅលើមេឃ និងបានឃើញផ្សែង ។ រូបភាពដែលបានផ្សព្វផ្សាយនៅក្នុងបណ្តាញ Telegram របស់អ៊ុយក្រែន បង្ហាញពីផ្សែងនៅមាត់សមុទ្រ ។ សារព័ត៌មាន Associated Press មិនអាចផ្ទៀងផ្ទាត់វីដេអូភ្លាមៗបានទេ ។
ការវាយប្រហារនេះកើតឡើងមួយថ្ងៃបន្ទាប់ពីមីស៊ីល និងកាំភ្លើងធំរបស់រុស្ស៊ីបានវាយប្រហារនៅទូទាំងប្រទេសអ៊ុយក្រែន ដោយបានសម្លាប់មនុស្សយ៉ាងហោចណាស់ ៥ នាក់ ខណៈដែលប្រធានាធិបតីអ៊ុយក្រែនបានជួបជាមួយប្រធានាធិបតី ចូ បៃដិន និងមេដឹកនាំសភានៅទីក្រុងវ៉ាស៊ីនតោនជាមួយនឹងកញ្ចប់ជំនួយបន្ថែមចំនួន ២៤ ពាន់លានដុល្លារដែលកំពុងត្រូវបានពិចារណាផ្ដល់ឲ្យអ៊ុយក្រែន ។
AP