អភិបាលនៃតំបន់ Bryansk របស់រុស្ស៊ីបាននិយាយថា អ៊ុយក្រែនបានបាញ់គ្រាប់បែកចង្កោមទៅលើភូមិរុស្ស៊ីក្បែរព្រំដែនអ៊ុយក្រែននេះថ្ងៃអង្គារ ដោយបានបំផ្លាញផ្ទះជាច្រើនខ្នង ។
អភិបាលតំបន់លោក Alexander Bogomaz បាននិយាយនៅលើកម្មវិធីផ្ញើសារ Telegram ថា យោងតាមព័ត៌មានបឋម មិនមានអ្នកស្លាប់បាត់បង់ជីវិតនៅក្នុងការបាញ់ផ្លោងនៅក្នុងភូមិ Klimovo នោះទេ ។
ចំណែកអ៊ុយក្រែនបានអះអាងពីការបំផ្លាញយន្តហោះគ្មានមនុស្សបើករុស្ស៊ីចំនួន ២៩ គ្រឿងក្នុងចំណោម ៣១ គ្រឿងដែលរុស្ស៊ីបាញ់បង្ហោះ និងមីស៊ីលមួយគ្រាប់ ដែលភាគច្រើននៃពួកវាត្រូវបានបាញ់សំដៅទៅលើតំបន់ Mykolaiv និង Dnipropetrovsk ។ រលកនៃការវាយប្រហារពេញមួយយប់បានអូសបន្លាយជាងបីម៉ោង នេះបើតាមបញ្ជាការខាងត្បូងនៃកងកម្លាំងអ៊ុយក្រែនបាននិយាយ ។
អ៊ុយក្រែនបានទទួលគ្រាប់បែកចង្កោមពីសហរដ្ឋអាម៉េរិក ប៉ុន្តែវាបានសន្យាថានឹងប្រើប្រាស់វាដើម្បីកម្ចាត់ការប្រមូលផ្តុំទាហានរុស្ស៊ីនៅលើទឹកដីអ៊ុយក្រែនប៉ុណ្ណោះ ។
មន្ត្រីរុស្ស៊ីនៅទីក្រុង Bryansk និងតំបន់ផ្សេងទៀតជាប់ព្រំដែនអ៊ុយក្រែនបានចោទប្រកាន់ក្រុងគៀវម្តងហើយម្តងទៀតអំពីការបាញ់ផ្លោងមិនរើសមុខដោយកងកម្លាំងប្រដាប់អាវុធអ៊ុយក្រែន ។
Reuters
