ក្រសួងការពារជាតិអ៊ុយក្រែនបានអះអាងកាលពីថ្ងៃអង្គារជាលើកដំបូងថា ខ្លួនបានបាញ់ទម្លាក់យន្តហោះគ្មានមនុស្សបើករបស់អ៊ីរ៉ង់ដែលកងទ័ពរុស្ស៊ីប្រើប្រាស់ក្នុងសង្រ្គាមនៅអ៊ុយក្រែន ។ នេះបើយោងតាមការចេញផ្សាយដោយសារព័ត៌មាន Washington Examiner ។
ក្រសួងការពារជាតិអ៊ុយក្រែនបានបង្ហោះរូបថតនៃបំណែកយន្តហោះគ្មានមនុស្សបើកនៅលើប្រព័ន្ធផ្សព្វផ្សាយសង្គម ហើយកំណត់ថាវាជាយន្តហោះគ្មានមនុស្សបើកប្រភេទ Shahed-136 ។ ក្រសួងការពារជាតិអ៊ុយក្រែនបាននិយាយថា កងទ័ពខ្លួនបានបាញ់ទម្លាក់យន្តហោះគ្មានមនុស្សបើកនៅជិតភូមិ Kupiansk ទីក្រុង Kharkiv ដែលជាទីតាំងនៃការវាយលុកដែលកំពុងបន្ត និងជោគជ័យបំផុតរបស់អ៊ុយក្រែន ចាប់តាំងពីរុស្ស៊ីបានឈ្លានពាននៅចុងខែកុម្ភៈ ។
មន្ត្រីអ៊ុយក្រែនមិនបានផ្តល់ព័ត៌មានលម្អិតជាច្រើនអំពីយន្តហោះគ្មានមនុស្សបើកនោះទេ ។
រដ្ឋបាលលោក បៃដិន បានព្រមានជាសាធារណៈកាលពីខែកក្កដាថា រុស្ស៊ីកំពុងស្វែងរកទិញយន្តហោះគ្មានមនុស្សបើករាប់រយគ្រឿងពីអ៊ីរ៉ង់ ។ មន្ត្រីរដ្ឋបាលបានបញ្ជាក់ទៅកាន់សារព័ត៌មាន Washington Examiner កាលពីចុងខែសីហាថា រុស្ស៊ីបានទិញយន្តហោះគ្មានមនុស្សបើកពីអ៊ីរ៉ង់ ។